സ്മാർട്ട്ഫോണുകളുടെ കാലത്തും ഫീച്ചർ ഫോണുകൾ ഉപയോഗിക്കുന്നവരുടെ എണ്ണത്തിൽ വലിയ ഇടിവൊന്നും തന്നെ സംഭവിച്ചിട്ടില്ല. രാജ്യത്ത് മാത്രം 25 കോടിയോളം ആളുകൾ കീപാഡ് ഫോണുകൾ ഉപയോഗിക്കുന്നുവെന്നാണ് കണക്കുകൾ വ്യക്തമാക്കുന്നത്.
സ്മാർട്ട്ഫോണിനൊപ്പം സ്മാർട്ടാവുകയാണ് ഫീച്ചർ ഫോണുകളും. ഫീച്ചർ ഫോൺ ഉപയോക്താക്കൾക്കായി ജിയോ അവതരിപ്പിച്ച സ്മാർട്ട് ഫീച്ചർഫോണായിരുന്നു ജിയോഫോൺ 4ജി. മികച്ച സവിശേഷതകളുമായി ഏറ്റവും പുതിയ ജിയോഫോൺ വിപണിയിൽ അവതരിപ്പിച്ചിരിക്കുകയാണ്. ജിയോഫോൺ പ്രൈമ 4ജി എന്ന ഫോണാണ് ലോഞ്ച് ചെയ്തിരിക്കുന്നത്.
ഫീച്ചർ ഫോണിന്റെ രൂപമാണെങ്കിലും ജിയോഫോൺ പ്രൈമ 4ജിയിൽ വാട്സ്ആപ്പ്, ഫേസ്ബുക്ക്, യുട്യൂബ് തുടങ്ങിയ ആപ്ലിക്കേഷനുകൾ പ്രവർത്തിക്കുമെന്നതാണ് ഇതിന്റെ പ്രധാന സവിശേഷത. യുപിഐ പേയ്മെന്റുകൾ നടത്തുന്നതിനായി ‘ജിയോ പേ’ ആപ്പും ലഭ്യമാണ്. ഒടിടി ആപ്പുകളായ ജിയോസിനിമ, ജിയോടിവി,ജിയോസോവൻ, ജിയോചാറ്റ് എന്നിവയും ജിയോഫോൺ പ്രൈമ 4ജിയിൽ ആസ്വദിക്കാൻ കഴിയും. 23 ഭാഷകൾ ഫോൺ പിന്തുണയ്ക്കുന്നു.
KaiOS-ലാണ് ഫോൺ പ്രവർത്തിക്കുന്നത്. വെ-ഫൈ, ബ്ലൂടൂത്ത് 5.0, എഫ്എം റേഡിയോ എന്നിവയും ലഭ്യമാണ്. മൈക്രോ എസ്ഡി കാർഡ് ഉപയോഗിച്ച് 128 ജിബി വരെ സ്റ്റോറേജ് വർദ്ധിപ്പിക്കാൻ സാധിക്കും. 18000 mAh ബാറ്ററിയാണ് നൽകിയിരിക്കുന്നത്. ഒരു പിൻ ക്യാമറയും 0.3 എംപി സെൽഫി ക്യാമറയുമാണ് നൽകിയിട്ടുള്ളത്. 2,599 രൂപയാണ് ജിയോഫോൺ പ്രൈമ 4ജിയുടെ വില. ദീപാവലിയോടനുബന്ധിച്ച് ഫോൺ വിപണിയിൽ ലഭ്യമാകുമെന്നാണ് സൂചന.
