എസ്ബിഐ കാർഡും റിലയൻസ് റീട്ടെയിലും ചേർന്ന് കോ-ബ്രാൻഡഡ് ‘റിലയൻസ് എസ്ബിഐ കാർഡ്’ പുറത്തിറക്കി. റിലയൻസ് എസ്ബിഐ കാർഡ്, റിലയൻസ് എസ്ബിഐ കാർഡ് പ്രൈം എന്നീ രണ്ട് കാർഡുകളാണ് ഇരു സ്ഥാപനങ്ങളും സംയുക്തമായി ചേർന്ന് പുറത്തിറക്കിയിരിക്കുന്നത്.
നിരവധി ആകർഷകമായ ഓഫറുകളാണ് റിലയൻസ് കാർഡ് സ്വന്തമാക്കുന്നവർക്കായി പ്രഖ്യാപിച്ചിരിക്കുന്നത്. വസ്ത്രങ്ങൾ മുതൽ പലചരക്ക് സാധനങ്ങൾക്ക് വരെയും റിലയൻസ് ഔട്ട്ലെറ്റുകളിൽ പ്രത്യേക കിഴിവ് ലഭിക്കും. കൂടാതെ ഇലക്ട്രോണിക്സ്, ഫാർമ, ഫർണിച്ചർ, ആഭരണങ്ങൾ എന്നിവയ്ക്കും പ്രത്യേക കിഴിവുകൾ ലഭ്യമാകുമെന്നും കമ്പനി അറിയിച്ചു. റിലയൻസ് സ്മാർട്ട്, സ്മാർട്ട് ബസാർ, റിലയൻസ് ഫ്രഷ് സിഗ്നേച്ചർ, റിലയൻസ് ഡിജിറ്റൽ, റിലയൻസ് ട്രെൻഡ്സ്, ജിയോമാർട്ട്, അജിയോ, റിലയൻസ് ജൂവൽസ്, അർബൻ ലാഡർ, നെറ്റ്മെഡ്സ് എന്നിവ റിലയൻസ് റീട്ടെയിലിന്റെ കീഴിൽ വരുന്ന സ്റ്റോറുകളാണ്. ഇവയിലാണ് പ്രധാനമായും കിഴിവുകൾ ലഭിക്കുന്നത്.
റിലയൻസ് എസ്ബിഐ കാർഡ് പ്രൈമിന്റെ വാർഷിക ഫീസ് 2,999 രൂപയാണ്. റിലയൻസ് എസ്ബിഐ കാർഡിന് 499 രൂപയാണ് നിരക്ക്. റിലയൻസ് എസ്ബിഐ കാർഡ് പ്രൈമിൽ 3,00,000 രൂപയും റിലയൻസ് എസ്ബിഐ കാർഡിൽ 1,00,000 രൂപ വരെയും ഷോപ്പിംഗ് നടത്തുകയാണെങ്കിൽ കാർഡ് ഉടമകൾക്ക് പുതുക്കൽ ഫീസിൽ ഇളവുകൾ ലഭിക്കും.