ന്യൂഡൽഹി: ക്രിക്കറ്റ് ലോകത്തെ ഞെട്ടിച്ചുകൊണ്ട് പുതിയ വെളിപ്പെടുത്തലുമായി മുൻ ഇന്ത്യൻ താരം യുവരാജ് സിംഗ്. ഇന്ത്യൻ മുൻ ഇന്ത്യൻ നായകൻ ധോണിയുമായി തനിക്ക് സൗഹൃദമില്ലെന്നാണ് ഇന്ത്യ കണ്ട എക്കാലത്തെയും മികച്ച ഓൾറൗണ്ടർമാരിലൊരാളായ യുവരാജ് സിംഗ് വെളിപ്പെടുത്തിയിരിക്കുന്നത്. ടി.ആർ.എസ് പോഡ്കാസ്റ്റിലൂടെയാണ് താരം ഇക്കാര്യമറിയിച്ചത്.
ആരാധകരുടെ തലയും യുവിയും അടുത്ത സുഹൃത്തുക്കളാണെന്നാണ് ഇത്രയും നാൾ ക്രിക്കറ്റ് ലോകം കരുതിയിരുന്നത്. എന്നാൽ യുവരാജിന്റെ ഈ വെളിപ്പെടുത്തലോടെ ആരാധകരും നിരാശയിലാണ്. പ്രൊഫഷണൽ കരിയറിൽ മാത്രമാണ് ധോണിയുമായി സൗഹൃദമുള്ളതെന്നാണ് യുവരാജ് പറഞ്ഞത്. ‘ ഞാനും മഹിയും അടുത്ത സുഹൃത്തുക്കളല്ല. ക്രിക്കറ്റ് മൂലമുള്ള സൗഹൃദം മാത്രമാണ് ഞങ്ങൾക്കിടയിലുള്ളത്. എന്റെ ജീവിതരീതിയും അദ്ദേഹത്തിന്റെ ജീവിതരീതിയും തമ്മിൽ അന്തരമുണ്ട്. ഞങ്ങൾ ഒരിക്കലും അടുത്ത സുഹൃത്തുക്കളായിട്ടില്ല.’ – യുവരാജ് പറഞ്ഞു.
പക്ഷേ രാജ്യത്തിനായി ക്രീസിലിറങ്ങുമ്പോൾ ഞങ്ങൾ ഇരുവരും 100 ശതമാനം പ്രകടനം പുറത്തെടുക്കാറുണ്ട്. ‘ ധോനി ക്യാപ്റ്റനും ഞാൻ വൈസ് ക്യാപ്റ്റനും ആയി പ്രവർത്തിച്ചിട്ടുണ്ട്. അദ്ദേഹം എന്നേക്കാളും നാല് വർഷം ജൂനിയറാണ്. മത്സരത്തിനിടെ ഞങ്ങൾ ഒരുമിച്ച് പല തീരുമാനങ്ങളും എടുത്തിട്ടുണ്ട്. അദ്ദേഹത്തിന്റെ ചില തീരുമാനങ്ങൾ എനിക്കിഷ്ടപ്പെടാറില്ല. തിരിച്ചും സംഭവിക്കാറുണ്ട്. അത് എല്ലാ ടീമിലും സംഭവിക്കുന്നതാണ്’-യുവരാജ് പറഞ്ഞു.
കരിയറിന്റെ അവസാനം തനിക്ക് കൃത്യമായി മറുപടി തന്ന ഏകവ്യക്തി ധോണിയായിരുന്നെന്നും യുവി കൂട്ടിച്ചേർത്തു. 2019 ലോകകപ്പിന് മുന്നോടിയായി തന്നെ ടീമിലേക്ക് സെലക്ഷൻ കമ്മിറ്റി പരിഗണിക്കില്ലെന്ന് ധോണി പറഞ്ഞിരുന്നു. ഇത് തിരിച്ചറിഞ്ഞതോടെയാണ് വിരമിച്ചതെന്നും ഗ്രൗണ്ടിൽ അടുത്ത സൃഹൃദ്ബന്ധത്തിന്റെ ആവശ്യമില്ലെന്നും യുവരാജ് കൂട്ടിച്ചേർത്തു.
