ജാനേമൻ, ജയ ജയ ജയ ജയ ഹേ എന്നീ സൂപ്പർ ഹിറ്റ് ചിത്രങ്ങൾക്ക് ശേഷം നടൻ ബേസിൽ ജോസഫും ചിയേഴ്സ് എന്റർടെയ്ൻമെന്റും ഒന്നിക്കുന്ന ഏറ്റവും പുതിയ ചിത്രമാണ് ഫാലിമി. 10 ന് ചിത്രം തീയറ്ററുകളിലെത്തും. നവാഗതനായ നിർമ്മൽ സഹദേവാണ് ചിത്രത്തിന്റെ സംവിധായകൻ. ഇപ്പോഴിതാ ചിത്രത്തിന്റെ ട്രെയിലർ പുറത്തുവിട്ടിരിക്കുകയാണ് അണിയറ പ്രവർത്തകർ. നർമ്മത്തിൽ പൊതിഞ്ഞ ഒരു കുടുംബ ചിത്രമായിരിക്കും ഫാലിമി എന്ന് ചിത്രത്തിന്റെ ടീസറിൽ നിന്ന് തന്നെ വ്യക്തമാണ്. അതേ അളവിൽ ഒട്ടും കുറവ് വരാതെ ആദ്യാവസാനം ചിരിപടർത്തുന്ന ട്രെയിലറാണ് അണിയറ പ്രവർത്തകർ ഇപ്പോൾ പുറത്തിറക്കിയിരിക്കുന്നത്.
കുടുംബസമേതം ബനാറസ്സിലേയ്‌ക്ക് യാത്ര പോകുന്ന ഒരു കുടുബ കഥ രസകരമായി പറയാൻ ശ്രമിക്കുകയാണ് ചിത്രത്തിലൂടെ. സിനിമയിൽ മഞ്ജു പിള്ളയും ജഗദീഷും പ്രധാന വേഷത്തിൽ എത്തുന്നുണ്ട്. കൂടാതെ സന്ദീപ് പ്രദീപ്, മീനാരാജ്, ജോമോൻ ജ്യോതിർ, അഭിറാം രാധാകൃഷ്ണൻ തുടങ്ങിയവരും ചിത്രത്തിൽ അണിനിരക്കുന്നുണ്ട്. നേരത്തെ പുറത്തുവിട്ട സിനിമയുടെ ടൈറ്റിൽ വീഡിയോയും ടീസറും ശ്രദ്ധേയമായിരുന്നു.
ബേസിൽ ജോസഫും ജഗദീഷും ഇതാദ്യമായാണ് ഒന്നിക്കുന്നത്. ഏറെ കാലത്തിന് ശേഷം ജഗദീഷ് ഒരു മുഴുനീള കോമഡി വേഷമാണ് ചിത്രത്തിൽ കൈകാര്യം ചെയ്യുന്നത്. സംവിധായകൻ നിതീഷ് സഹദേവും സാഞ്ചോ ജോസഫും ചേർന്നാണ് തിരക്കഥ രചിച്ചിരിക്കുന്നത്. ചിയേഴ്സ് എന്റർടൈൻമെന്റ്സിന്റെ ബാനറിൽ ലക്ഷ്മി വാര്യർ, ഗണേഷ് മേനോൻ എന്നിവരും സൂപ്പർ ഡ്യൂപ്പർ ഫിലിംസിന്റെ ബാനറിൽ അമൽ പോൾസനും ചേർന്നാണ് ചിത്രം നിർമ്മിക്കുന്നത്.
