വിസ്മയങ്ങൾ ഇനിയുെ ഒളിപ്പിച്ച് വെച്ചിരിക്കുന്നിടമാണ് ബഹിരാകാശം. ഓരോ പഠനങ്ങളും ചിത്രങ്ങളും എന്നും കൗതുകവും ജിജ്ഞാസയും ഉണർത്തുന്നവയാണ്. അത്തരത്തിൽ കൗതുകം ഉണർത്തുന്നൊരു ചിത്രം പങ്കുവെച്ചിരിക്കുകയാണ് നാസ. വിദൂരത്ത് കൂട്ടിയിടിക്കുന്ന രണ്ട് ക്ഷീരപഥങ്ങളുടെ ക്ലസ്റ്ററുളെ ചിത്രമാണ് നാസ സമൂഹമാദ്ധ്യമങ്ങളിൽ പങ്കുവെച്ചത്. നാസയുടെ ജെയിംസ് വെബ്, ഹബിൾ എന്നീ ബഹിരാകാശ ദൂരദർശിനികളാണ് ഈ കണ്ണഞ്ചിപ്പിക്കുന്ന ചിത്രത്തിന് പിന്നിൽ. 4.3 ബില്യൺ പ്രകാശവർഷം അകലെയുള്ള ചിത്രമാണ് ദൂരദർശിനിയിൽ പതിഞ്ഞത്.
പ്രപഞ്ചത്തിലെ ഏറ്റവും വലിയ വസ്തുക്കളാണ് ക്ലസ്റ്റുകൾ എന്നറിയപ്പെടുന്നത്. ഗുരുത്വാകർഷണത്താൽ പരസ്പരം ബന്ധിക്കപ്പെട്ടിരിക്കുന്ന നിരവധി ഗാലക്സികളാണ് ഗാലക്സി ക്ലസ്റ്ററിൽ ഉൾപ്പെട്ടിട്ടുള്ളത്. അത്തരത്തിൽ വിദൂരത്തുള്ള രണ്ട് ക്ലസ്റ്ററുകളുടെ കൂട്ടിയിടി ആണ് ബഹിരാകാശത്ത് സംഭവിച്ചത്. രണ്ട് ദൂരദർശിനികളുടെ മികവും ശക്തിയുമാണ് ഇവിടെ പ്രകടമായതെന്ന് നാസ പറഞ്ഞു.
നാസയുടെ ദൂരദർശിനികൾ പകർത്തിയ ചിത്രമാണ് മുകളിൽ നൽകിയിരിക്കുന്നത്. തിളങ്ങുന്ന നിറത്തിൽ കാണുന്ന ഭാഗം പകർത്തിയത് ഹബിൾ ദൂരദർശിനിയും ഇൻഫ്രാറെഡിൽ കാണുന്നത് പകർത്തിയത് ജെയിംസ് വെബ് ദൂരദർശിനിയാണെന്നും നാസ പങ്കുവെച്ച പോസ്റ്റിൽ പറയുന്നു. മങ്ങിയതായി നീല നിറത്തിൽ കാണുന്ന താരാപഥങ്ങൾ താരതമ്യേന അടുത്താണ്. ഇവയിൽ നിന്നാണ് പലപ്പോഴും നക്ഷത്രങ്ങൾ രൂപപ്പെടുന്നത്. ഹബിൾ ടെലിസ്കോപ്പാണ് ഇതിനെ നിരീക്ഷിച്ചത്. ചുവന്ന താരാപഥങ്ങൾ കൂടുതൽ അകലെയാണ്. പലപ്പോഴും ഇതിനിടയിൽ പൊടിപടലങ്ങൾ കാണപ്പെടുന്നു. ഇതാണ് തരി പോലെ കാണപ്പെടുന്നത്. ജെയിംസ് വെബാണ് ഇതിനെ നിരീക്ഷിച്ചത്. ഇതിന് പുറമേ ചിത്രത്തിൽ നൂറുകണക്കിന് ഗാലക്സികളും ദൃശ്യമാണ്. ഇരു ദൂരദർശിനികളും പകർത്തിയ ചിത്രം സംയോജിപ്പിച്ചാണ് ഈ ചിത്രത്തിന്റെ പിറവി.
View this post on Instagram
MACS0416 എന്നാണ് ചിത്രത്തിന് നാസ നൽകിയിരിക്കുന്ന പേര്. ‘ക്രിസ്മസ് ട്രീ ഗാലക്സി’ എന്നാണ് ശാസ്ത്രജ്ഞർ ഇതിനെ വിളിക്കുന്നത്. മിന്നുന്ന വിളക്കുകൾ പോലെയും വളരെ വർണാഭമായുമാണ് ക്ലസ്റ്ററുകൾ കാണപ്പെടുന്നത്. ഇക്കാരണത്തലാണ് ക്രിസ്മസ് ട്രീ ഗാലക്സി എന്നു വിളിക്കുന്നത്. ഇൻസ്റ്റഗ്രാമിൽ പങ്കുവെച്ച് മണിക്കൂറുകൾക്കുള്ളിൽ ലക്ഷക്കണക്കിന് ആളുകളാണ് ചിത്രം കണ്ടത്.
