പഴമക്കാരുള്ള വീടുകളിലെ മുറ്റത്ത് നിറ സാന്നിധ്യമായി തുളസി ചെടികളെയും കാണാം. ഏതൊരു രോഗത്തിനും പരിഹാരമെന്നോളം തുളസിയില ഇട്ട നാട്ടു മരുന്നുകളാണ് മുത്തശ്ശിമാർ നമുക്ക് തന്നിരുന്നത്. തുളസിയിലയിൽ നിരവധി ഗുണങ്ങൾ അടങ്ങിയതു കൊണ്ടാണ് ഇതിട്ട വെള്ളം കുടിക്കണമെന്ന് പഴമക്കാർ പറയുന്നത്. തുളസിയിലയുടെ ഗുണങ്ങൾ എന്തൊക്കെയെന്ന് അറിയാം..
ആന്റിഓക്സിഡന്റുകൾ ധാരാളം അടങ്ങിയിരിക്കുന്ന തുളസിയില ശരീരത്തിലെ അനാവശ്യ കൊഴുപ്പുകൾ നീക്കം ചെയ്യാൻ സഹായിക്കുന്നു. അമിത ഭാരമുള്ളവർ അതിരാവിലെ വെറും വയറ്റിൽ തുളസിയിലയിട്ട വെള്ളം കുടിക്കുന്നത് വണ്ണം കുറയ്ക്കാനും സഹായിക്കുന്നു.
ഇതിനുപുറമെ വിഷാദ രോഗങ്ങൾ ഉള്ളവർ തുളസിയില ഇട്ട വെള്ളമോ ചായയോ കുടിക്കുന്നത് ഈ രോഗത്തിന്റെ വിവിധ ലക്ഷണങ്ങൾ നിയന്ത്രിച്ചു നിർത്തുന്നതിന് സഹായകരമാണെന്ന് പഠനങ്ങൾ പറയുന്നു. ഹൃദയാരോഗ്യം വർദ്ധിപ്പിക്കാൻ ഉത്തമമാണ് തുളസിയില. തുളസിവെള്ളം കുടിക്കുന്നത് രക്തസമ്മർദ്ദവും ശരീരത്തിലെ അമിത കൊളസ്ട്രോളും നിയന്ത്രിക്കാൻ സഹായകരമാണ്. ചുമ, ആസ്മ, ജലദോഷം തുടങ്ങിയ രോഗങ്ങളെ നിയന്ത്രിച്ച് ശ്വാസകോശ സംബന്ധമായ രോഗങ്ങളെ തടഞ്ഞു നിർത്തുന്നു.
