വിദ്യാർത്ഥികൾക്കും ഗവേഷകർക്കും സുബ്രഹ്മണ്യോപാസന ; “പ്രജ്ഞാവിവർദ്ധന കാർത്തികേയ സ്തോത്രം” ജപിക്കാം

പ്രജ്ഞ എന്നവാക്കിന് ബുദ്ധി അഥവാ ഗ്രഹണശക്തി എന്നാണ് സാമാന്യ അർഥം . ചിന്തിക്കാനും മനസിലാക്കാനും സ്ഥിരീകരിക്കാനും ഉള്ള മാനസികനിലപാട്‌ അഥവാ മനസിന്റെ ശക്‌തി എന്നതാണ് പ്രജ്ഞയുടെ നിർവ്വചനം. മനസ്സും മനശ്ശക്തിയും ബുദ്ധിയുമായി ബന്ധപ്പെട്ട എന്തെല്ലാം ഉണ്ടോ അതിന്റെയെല്ലാം സമഗ്രതയാണ് പ്രജ്ഞ. ആ പ്രജ്ഞ വർദ്ധിപ്പിക്കുവാനുതകുന്ന ധാരാളം സ്തോത്രങ്ങളും സ്തുതികളും ഋഷീശ്വരന്മാർ കണ്ടത്തിയിട്ടുണ്ട്. പ്രജ്ഞാവർദ്ധനവിനായി നിരവധി ദേവതകളോടുള്ള സ്തുതികൾ ഉണ്ട് . അവയിൽ ഏറ്റവും ഫലം തരുന്ന ഒന്നാണ് പ്രജ്ഞാവിവർദ്ധന കാർത്തികേയ സ്തോത്രം.

ഇത് ദേവസേനാപതിയായ ഭഗവാൻ സ്കന്ദനോടുള്ള സ്തുതിയാണ്. ഭഗവാൻ സുബ്രഹ്മണ്യന്റെ ഉപാസനാ പദ്ധതികളിൽ ഏറ്റവും ശ്രേയസ്കരമാണ് സ്കന്ദ ഷഷ്ഠി വ്രതം. അതിനോടൊപ്പമോ അല്ലാതെയോ സുബ്രഹ്മണ്യോപാസനക്ക് ഏറ്റവും പറ്റിയ സ്തുതിയാണ് പ്രജ്ഞാവിവർദ്ധന കാർത്തികേയ സ്തോത്രം. സ്കന്ദഷഷ്ഠി വ്രതം എടുക്കുന്ന നാളുകളിലും , കുമാരഷഷ്ഠി, വൈകാശി വിശാഖം, തൈപ്പൂയം, മാസ ഷഷ്ഠികൾ, പൂയം നക്ഷത്ര ദിനം,എന്നീ സുബ്രഹ്മണ്യ പ്രാധാന്യമായുള്ള ദിവസങ്ങളിൽ തുടങ്ങി നിത്യോപാസനക്ക് വരെ പ്രജ്ഞാവിവർദ്ധന കാർത്തികേയ സ്തോത്രം വളരെ നല്ലതാണ്.

മൂലമന്ത്രങ്ങൾ ജപിക്കുവാൻ ഗുരുപദേശം ആവശ്യമാണ്. എന്നാൽ സ്തുതികൾക്കും കീർത്തനങ്ങൾക്കും അത് വേണ്ട. അതിനാൽ പ്രജ്ഞാവിവർദ്ധന കാർത്തികേയ സ്തോത്രം ആർക്കും ജപിക്കാം.

വിദ്യാർത്ഥികൾക്കും റിസേർച്ച് ആൻഡ് ഡെവലപ്പ്മെന്റ് ജോലികൾ ചെയ്യുന്നവർക്കും ഒക്കെ കാമ്യമായി ജപിക്കാവുന്ന, സദ്ഫലം തരുന്ന സ്തോത്രമാണ് ഇത്. ഇത് നിത്യം ജപിക്കുന്നവർക്ക് ബുദ്ധിയും ഗ്രഹണശേഷിയും കാര്യ നിർവഹണ പടുത്വവും, നേതൃശേഷിയും വർധിക്കും.

ശ്രീ രുദ്രയാമള തന്ത്രത്തിന്റെ ഭാഗമായ “പ്രജ്ഞാവിവർദ്ധന കാർത്തികേയ സ്തോത്രം” താഴെക്കൊടുക്കുന്നു.

ഓം അഥാസ്യ പ്രജ്ഞാ വർദ്ധന സ്തോത്രസ്യ
ഭഗവാൻ ശിവ ഋഷി: അനുഷ്‌ടുപ് ഛന്ദ: സ്കന്ദ കുമാരോ ദേവത:
പ്രജ്ഞാ സിദ്ധ്യർദ്ധം ജപേ വിനിയോഗ:

ശ്രീ സ്കന്ദ ഉവാച ।
യോഗീശ്വരോ മഹാസേനഃ കാർത്തികേയോഽഗ്നിനന്ദനഃ ।
സ്കന്ദഃ കുമാരഃ സേനാനീഃ സ്വാമീ ശങ്കരസംഭവഃ ॥ 1 ॥

ഗാംഗേയസ്താമ്രചൂഡശ്ച ബ്രഹ്മചാരീ ശിഖിധ്വജഃ ।
താരകാരിരുമാപുത്രഃ ക്രൗംചാരിശ്ച ഷഡാനനഃ ॥ 2 ॥

ശബ്ദബ്രഹ്മസമുദ്രശ്ച സിദ്ധഃ സാരസ്വതോ ഗുഹഃ ।
സനത്കുമാരോ ഭഗവാൻ ഭോഗമോക്ഷഫലപ്രദഃ ॥ 3 ॥

ശരജന്മാ ഗണാധീശപൂർവജോ മുക്തിമാർഗകൃത് ।
സർവാഗമപ്രണേതാ ച വാംഛിതാർത്ഥപ്രദർശനഃ ॥ 4 ॥

അഷ്ടാവിംശതിനാമാനി മദീയാനീതി യഃ പഠേത് ।
പ്രത്യൂഷേ ശ്രദ്ധയാ യുക്തോ മൂകോ വാചസ്പതിർഭവേത് ॥ 5 ॥

മഹാമന്ത്രമയാനീതി മമ നാമാനുകീർത്തനം ।
മഹാപ്രജ്ഞാമവാപ്നോതി നാത്ര കാര്യ വിചാരണാ ॥ 6 ॥

ഇതി ശ്രീരുദ്രയാമളേ പ്രജ്ഞാവിവർദ്ധനാഖ്യം ശ്രീമത്കാർത്തികേയ സ്തോത്രം ॥