മുംബൈ: റിലയൻസ് ജിയോയ്ക്ക് ഓഗസ്റ്റിൽ 32.4 ലക്ഷം പുതിയ വരിക്കാരെ ലഭിച്ചുവെന്ന് ടെലികോം റെഗുലേറ്ററി അതോറിറ്റി ഓഫ് ഇന്ത്യ. ഇതോടെ ജിയോയുടെ മൊത്തം വരിക്കാരുടെ എണ്ണം 44.57 കോടിയായി ഉയർന്നെന്ന് ട്രായ് പറയുന്നു. സംസ്ഥാനത്ത് 1.06 ലക്ഷം പുതിയ ഉപയോക്താക്കളെ നേടിയെന്ന് ജിയോ പുറത്തു വിട്ട കണക്കുകളിൽ സൂചിപ്പിക്കുന്നു. ഇതോടെ സംസ്ഥാനത്തെ ആകെ വരിക്കാരുടെ എണ്ണം 104.59 ലക്ഷമായി ഉയർന്നു.
ഓഗസ്റ്റിൽ രാജ്യത്തെ മൊത്തം ബ്രോഡ്ബാൻഡ് വരിക്കാരുടെ എണ്ണം പ്രതിമാസം 0.96 ശതമാനമായി ഉയർന്നിരുന്നു. ഇതോടെ 87.6 കോടിയാണ് ബ്രോഡ്ബാൻഡ് വരിക്കാർ. റിലയൻസ് ജിയോയ്ക്ക് 45 കോടി ബ്രോഡ്ബാൻഡ് വരിക്കാരാണ് ഉള്ളത്.
രാജ്യത്തെ മുഴുവൻ വയർലെസ് വരിക്കാരുടെ എണ്ണം ഓഗസ്റ്റ് വരെ 114.8 കോടിയായി ഉയർന്നു. നഗര, ഗ്രാമീണ വയർലെസ് സബ്സ്ക്രിപ്ഷന്റെ പ്രതിമാസ വളർച്ചാ നിരക്ക് 0.13, 0.26 എന്നിങ്ങനെയാണ്. 0.56 ശതമാനം വളർച്ചയുടെ പിൻബലത്തിൽ ഓഗസ്റ്റ് അവസാനത്തോടെ വയർലൈൻ വരിക്കാരുടെ എണ്ണം മൂന്ന് കോടിയായി ഉയർന്നു. ഓഗസ്റ്റിൽ ജിയോ 1.78 ലക്ഷം വയർലൈൻ വരിക്കാരെ സ്വന്തമാക്കി.
