പാകിസ്താൻ മുൻ പേസ് ബൗളർ വഹാബ് റിയാസിനെ ചീഫ് സെലക്ടറായി നിയമിച്ച് പാകിസ്താൻ ക്രിക്കറ്റ് ബോർഡ്. നേരത്തെ ലോകകപ്പിലെ മോശം പ്രകടനത്തെ തുടർന്ന് സെലക്ഷൻ കമ്മിറ്റിയെ പിസിബി പുറത്താക്കിയിരുന്നു. ഓസ്ട്രേലിയയിൽ നടക്കാനിരിക്കുന്ന ടെസ്റ്റ് പരമ്പരയിലും ന്യൂസിലൻഡിനെതിരെയുളള ടി-20 യുടെ ടീമിനെ തിരഞ്ഞെടുക്കലുമാണ് റിയാസിന് മുമ്പിലുളള ആദ്യ കടമ്പ. ടീമിന്റെ ചീഫ് സെലക്ടർ ഇൻസമാം ഉൾ ഹഖും ബൗളിംഗ് കോച്ചായ മോണി മോർക്കലും നേരത്തെ സ്ഥാനം ഒഴിഞ്ഞിരുന്നു.
ചീഫ് സെലക്ടറായി ചുമതലയേൽക്കുന്നതിൽ ഞാൻ അഭിമാനിക്കുന്നു. ഈ ഉത്തരവാദിത്തം എന്നെ ഏൽപ്പിച്ച പിസിബി ചെയർമാൻ സാക്ക അഷ്റഫിനോട് ഞാൻ നന്ദി പറയുന്നു. വളരെ വെല്ലുവിളി നിറഞ്ഞ ചുമതലയാണിത്. പ്രധാനപ്പെട്ട ടൂർണമെന്റുകൾക്കുള്ള മുന്നൊരുക്കമായാണ് ഓസ്ട്രേലിയയ്ക്കെതിരെയും ന്യൂസിലൻഡിനുമെതിരെയുളള മത്സരങ്ങളെ കാണുന്നത്- വഹാബ് റിയാസ് പറഞ്ഞു. അടുത്ത വർഷം നടക്കാനിരിക്കുന്ന ടി20 ലോകകപ്പാണ് ഞങ്ങളുടെ ലക്ഷ്യമെന്നും താരം വ്യക്തമാക്കി.