ലോകകപ്പിൽ ഓസ്ട്രേലിയയുടെ ഫോം കാര്യമാക്കുന്നില്ലെന്നും കീരിടം നേടാനാകുമെന്ന വിശ്വാസമാണുള്ളതെന്നും ഇന്ത്യൻ നായകൻ രോഹിത് ശർമ്മ. ഫൈനലിൽ ടോസ് നിർണായകമല്ലെന്നും മുഖ്യപരിശീലകൻ രാഹുൽ ദ്രാവിഡിന്റെ പങ്ക് വളരെ വലുതാണെന്നും അദ്ദേഹം പറഞ്ഞു. ഫൈനലിന് മുന്നോടിയായുള്ള വാർത്താസമ്മേളനത്തിൽ സംസാരിക്കുകയായിരുന്നു അദ്ദേഹം.
ടോസ് നിർണായകമല്ല. പിച്ചിൽ ചെറിയ രീതിയിൽ പുല്ലുണ്ട്. പരിശോധിച്ചപ്പോൾ സ്ലോ പിച്ചാണെന്ന് മനസ്സിലായി. മൂന്ന് സ്പിന്നർമാരെ കളിപ്പിക്കണോ എന്ന് പിന്നീട് തീരുമാനിക്കും. ലോകകപ്പിലെ ആദ്യ മത്സരങ്ങൾ കളിക്കാൻ കഴിയാതിരുന്നത് ഷമിക്ക് ബുദ്ധിമുട്ടായിരുന്നു. എന്നാൽ അവസരം ലഭിച്ചപ്പോൾ അദ്ദേഹം മികച്ച പ്രകടനമാണ് കാഴ്ച വയ്ക്കുന്നത്.
ഏറ്റവും ശാന്തമായ രീതിയിലാണ് ഞാൻ ഇപ്പോൾ ചിന്തിക്കുന്നത്. കഠിനാധ്വാനം ചെയ്തതിനാൽ മത്സരത്തിൽ വിജയിക്കാനാകുമെന്ന വിശ്വാസമാണ് എനിക്കുള്ളത്. ടീമിൽ ഫൈനലിനെ വ്യത്യസ്തമായ രീതിയിലാണ് എല്ലാവരും നോക്കി കാണുന്നത്. ചില മുഖങ്ങളിൽ പുഞ്ചിരിയും ചില മുഖങ്ങളിൽ ടെൻഷനുമുണ്ട്. പക്ഷേ ഇത് മത്സരത്തിന്റെ ഭാഗമാണ്. ഇന്ത്യക്ക് വേണ്ടി കളിക്കുന്ന എല്ലാ മത്സരങ്ങളും ഫൈനൽ പോലെയാണ്. ഈ ലോകകപ്പിലെ ഇതു വരെയുള്ള നിമിഷങ്ങളെല്ലാം ഞങ്ങൾ ആസ്വദിച്ചു. ലോകകപ്പ് നേടാനാകുമെന്ന ആത്മവിശ്വാസത്തിലാണ് ടീമെന്നും താരങ്ങൾ ആവേശത്തിലാണെന്നും രോഹിത് പ്രതികരിച്ചു.
ഓസ്ട്രേലിയക്ക് ലോകകപ്പ് ഫൈനലിലുള്ള പരിചയം കാര്യമാക്കുന്നില്ല. തുടർച്ചയായ ഏട്ട് മത്സരങ്ങൾ ജയിച്ചാണ് ഓസ്ട്രേലിയ ഫൈനൽ കളിക്കാൻ എത്തുന്നത്. അവരുടെ ബാറ്റർമാരും ബൗളർമാരും മികച്ച പ്രകടമാണ് കാഴ്ച വയക്കുന്നത്. ഓസീസിന് മത്സരത്തിൽ എവിടം വരെ പോകാനാകുമെന്ന് ഞങ്ങൾക്കറിയാം. പക്ഷേ ഞങ്ങൾ ഞങ്ങളുടെ മത്സരത്തിൽ ശ്രദ്ധ കേന്ദ്രീകരിക്കാനാണ് ആഗ്രഹിക്കുന്നത്.