2023ലെ വിശ്വസുന്ദരി പട്ടം സ്വന്തമാക്കി നിക്കരാഗ്വയുടെ ഷെയ്ന്നിസ് അലോണ്ട്ര പാലസിയോസ് കോർണെജോ. മധ്യ അമേരിക്കൻ രാജ്യമായ എൽ സാൽവേഡറിൽ വച്ച് നടന്ന ചടങ്ങിൽ മുൻ വിശ്വസുന്ദരി ആർ’ബോണ്ണി ഗബ്രിയേൽ ആണ് നിക്കരാഗ്വയുടെ പാലസിയോസിന് കിരീടം അണിയിച്ചത്. തായ്ലാൻഡിന്റെ അന്റോണിയോ പോർസിൽഡ് റണ്ണറപ്പായി. മൂന്നാം സ്ഥാനം ഓസ്ട്രേലിയയുടെ മൊറായ വിൽസണും ലഭിച്ചു.
MISS UNIVERSE 2023 IS @Sheynnispalacios_of !!!! 👑 🇳🇮@mouawad #72ndMISSUNIVERSE #MissUniverse2023 pic.twitter.com/cSHgnTKNL2
— Miss Universe (@MissUniverse) November 19, 2023
ഇത്തവണത്തെ വിശ്വസുന്ദരി മത്സരത്തിന് 84 വനിതകളാണ് പങ്കെടുത്തത്. ആദ്യത്തെ 20 പേരിൽ സ്ഥാനം പിടിക്കാൻ ഇന്ത്യയുടെ ശ്വേത ശാരദയ്ക്കും കഴിഞ്ഞിരുന്നു. എൽ സാൽവേഡറിലെ ജോസ് അഡോൾഫോ പിനെദ അരീനയിൽ വച്ചായിരുന്നു 72-ാം വിശ്വസുന്ദരി മത്സരം നടന്നത്. 1975 മുതൽ ആരംഭിച്ച ചടങ്ങിന് ആദ്യമായാണ് മദ്ധ്യ അമേരിക്കൻ രാജ്യമായ എൽ സാൽവേഡർ ആതിഥേയത്വം വഹിക്കുന്നത്.
വിശ്വസുന്ദരി പ്രഖ്യാപനത്തിന് പിന്നാലെ നേട്ടം സ്വന്തമാക്കിയ പാലസിയോസ് വികാരനിർഭരയായിരുന്നു. കമ്യൂണിക്കേഷൻസിൽ ബിരുദധാരിയാണ് നിക്കരാഗ്വയെ പ്രതിനിധീകരിച്ചെത്തിയ പാലസിയോസ്. 23 വയസുള്ള ഇവർ ഉത്കണ്ഠ സംബന്ധിച്ച പല പ്രശ്നങ്ങളും നേരിട്ടിരുന്നതിനാൽ Understand Your Mind എന്ന പേരിൽ ആരംഭിച്ച പദ്ധതിയും മിസ് യൂണിവേഴ്സ് വേദിയിൽ ചർച്ചയായി. മാനസികാരോഗ്യത്തിന്റെ പ്രാധാന്യം അറിയിക്കുന്നതിനും മാനസിക പ്രശ്നങ്ങളിലൂടെ കടന്നുപോകുന്നവരെ സഹായിക്കുന്നതിനും വേണ്ടിയുള്ള പദ്ധതിയായിരുന്നു അത്.
പസഫിക് സമുദ്രത്തിനും കരീബിയൻ കടലിനും ഇടയിലായി സ്ഥിതി ചെയ്യുന്ന മദ്ധ്യ അമേരിക്കൻ രാജ്യമാണ് നിക്കരാഗ്വ. 68 ലക്ഷം പേർ മാത്രമാണ് ഇവിടെ വസിക്കുന്നത്. സ്പാനിഷാണ് ഭാഷ.
