ഗുരുവായൂർ ക്ഷേത്രത്തിലെ സദ്യ വളരെ പ്രസിദ്ധമാണ്. ഇതിൽ പ്രശസ്തമായ കറികളിൽ ഒന്നാണ് രസകാളൻ. ഒരിക്കൽ ഇതിന്റെ രുചിയറിഞ്ഞവർ പിന്നീടൊരിക്കലും ആ സ്വാദ് മറന്നിട്ടുണ്ടാകില്ല. ഇതിന്റെ കൂട്ടെന്തായിരിക്കുമെന്ന് ചിന്തിച്ചിട്ടുമുണ്ടാകാം. രുചികരമായ ആ രുചിക്കൂട്ട് വീട്ടിൽ പരീക്ഷിക്കാവുന്നതാണ്. ഇതിന് എന്തെല്ലാം ചേരുവകളാണ് വേണ്ടതെന്ന് നോക്കാം….
ചേരുവകൾ…
- മത്തൻ – കാൽ കിലോ ചെറുതായി അരിഞ്ഞത്
- കുമ്പളങ്ങ – കാൽ കിലോ ചെറുതായി അരിഞ്ഞത്
- പച്ചമുളക് – രണ്ടെണ്ണം നീളത്തിൽ അരിഞ്ഞത്
- തേങ്ങ – അര കപ്പ്
- ജീരകം – ഒരു സ്പൂൺ
- പച്ചമുളക് – രണ്ടെണ്ണം
- തൈര് – ഒരു കപ്പ്
- മോര് – ഒരു കപ്പ്
- ഉപ്പ് – ആവശ്യത്തിന്
- മഞ്ഞൾപ്പൊടി – കാൽ സ്പൂൺ
- കുരുമുളകുപൊടി – കാൽ സ്പൂൺ
- ചുവന്ന മുളക് ചതച്ചത് – മൂന്ന് സ്പൂൺ
- കറി വേപ്പില – രണ്ട് തണ്ട്
- ജീരകപ്പൊടി – ഒരു സ്പൂൺ
- വെണ്ണ – ഒരു സ്പൂൺ
- കടുക് – ഒരു സ്പൂൺ
തയ്യാറാക്കുന്ന വിധം
പാത്രത്തിലേക്ക് മത്തൻ, കുമ്പളങ്ങ, പച്ചമുളക്, മോര്, ചതച്ച് വെച്ച ചുവന്ന മുളക്, കുരുമുളക്പൊടി, മഞ്ഞൾപൊടി, ഉപ്പ്, കറിവേപ്പില എന്നിവ ചേർത്ത് നന്നായി വേവിച്ചെടുക്കുക. ഈ ചേരുവകൾ വേവുന്ന സമയം തേങ്ങ, പച്ചമുളക്, ജീരകം, രണ്ട് സ്പൂൺ തൈര് എന്നിവ ചേർത്ത് നന്നായി അരച്ചെടുക്കുക.
ശേഷം വേവിച്ച പച്ചക്കറിയിലേക്ക് അരച്ചുവെച്ചിരിക്കുന്ന ഈ കൂട്ട് ചേർത്ത് നന്നായി ഇളക്കി യോജിപ്പിക്കുക. കുറുകിയിരിക്കുന്ന കറിയിലേക്ക് കട്ട തൈരും ജീരകപ്പൊടിയും ചേർത്ത് നന്നായി ഇളക്കുക. ഇത് തിളച്ച് വരുമ്പോഴേക്കും ഒരു ചീനചട്ടിയിൽ വെണ്ണ ചേർത്ത് ചൂടാക്കുക. കടുക്, ചതച്ച ചുവന്ന മുളക്, കറിവേപ്പില എന്നിവ ചേർത്ത് വറുത്തെടുക്കുക. ശേഷം ഇത് കറിയിലേക്ക് ഒഴിക്കാവുന്നതാണ്. ഇതോടെ പ്രശസ്തമായ രസകാളൻ തയ്യാർ.