ഓരോ രാജ്യങ്ങൾക്കും ഓരോ നിയമങ്ങളും ശിക്ഷാവിധിയുമാണുള്ളത്. അത്തരത്തിൽ ഒരു ശിക്ഷാവിധിയാണ് ഇപ്പോൾ ശ്രദ്ധേയമാകുന്നത്. ഇറ്റലിയിലെ ഒരു കോടതി 200 പ്രതികൾക്ക് 2,200 വർഷം തടവുശിക്ഷ വിധിച്ചു. മാഫിയ സംഘത്തിലെ പ്രതികൾക്കാണ് ശിക്ഷ വിധിച്ചത്. മൂന്ന് വർഷമായി നടക്കുന്ന വിചാരണയ്ക്കൊടുവിലാണ് ഇത്തരമൊരു വിധി പുറപ്പെടുവിച്ചിരിക്കുന്നത്.
കൊള്ളയടിക്കൽ, മയക്കുമരുന്ന് കടത്ത്, കൊലപാതകം, കള്ളപ്പണം വെളുപ്പിക്കൽ എന്നീ കുറ്റകൃത്യങ്ങൾക്കാണ് പ്രതികളെ ശിക്ഷിച്ചിരിക്കുന്നത്. എൻഡ്രാംഗെറ്റ എന്ന ക്രിമിനൽ മാഫിയാ സംഘത്തിൽപ്പെട്ടവരാണ് ശിക്ഷിക്കപ്പെട്ട പ്രതികൾ. ഇറ്റലി മുൻ പ്രധാനമന്ത്രി സിൽവിയോ ബെർലുസ്കോണിയുടെ പാർട്ടിയായ ഫോർസയുടെ അഭിഭാഷകനും ശിക്ഷിക്കപ്പെട്ട പ്രതികളിൽ ഉൾപ്പെട്ടിട്ടുണ്ട്. അഭിഭാഷകനായ പിറ്റെല്ലിക്ക് 11 വർഷത്തെ തടവ് ശിക്ഷയാണ് വിധിച്ചത്.
സിവിൽ സർവീസുകാർ, പ്രമുഖ വ്യവസായികൾ, പ്രൊഫഷണലുകൾ എന്നിവരും പ്രതികളിൽ ഉൾപ്പെടുന്നു്. നൂറിലധികം പ്രതികളെ കോടതി വെറുതെ വിടുകയും ചെയ്തു. 600 ഓളം അഭിഭാഷകരെയും 900 സാക്ഷികളെയും കേസിന്റെ വിചാരണ ഘട്ടത്തിൽ ഹാജരാക്കിയിരുന്നു. യൂറോപ്പിൽ നടക്കുന്ന ലഹരിക്കടത്തിൽ 80 ശതമാനം വരെ നിയന്ത്രിക്കുന്നത് എൻഡ്രാംഗെറ്റ എന്ന മാഫിയാ സംഘമാണെന്ന് അന്വേഷണത്തിൽ കണ്ടെത്തിയിരുന്നു.
