അമൃത്സർ: പാകിസ്താൻ ആസ്ഥാനമായി പ്രവർത്തിക്കുന്ന ഭീകരസംഘടനകളുമായി ബന്ധം പുലർത്തിയ മൂന്ന് യുവാക്കളെ അറസ്റ്റ് ചെയ്ത് പഞ്ചാബ് പോലീസ്. ഇവരുടെ പക്കൽ നിന്ന് 30 കാട്രിഡ്ജുകളടക്കം നിരവധി ആയുധങ്ങൾ പോലീസ് കണ്ടെടുത്തു. പാക് ചാരസംഘടനയായ ഐഎസ്ഐയുടെ നിർദ്ദേശത്താൽ പ്രവർത്തിക്കുന്ന ഭീകരസംഘടനയുമായി ഇവർക്ക് ബന്ധമുണ്ടെന്നായിരുന്നു ഇന്റലിജൻസ് കണ്ടെത്തിയത്. യുവാക്കളുടെ വീടുകളിൽ നടത്തിയ പരിശോധനയിൽ നിന്നും എട്ട് വെടിക്കോപ്പുകൾ, 9 മാഗസീനുകൾ, 30 ലൈവ് കാട്രിഡ്ജുകൾ എന്നിവയാണ് പഞ്ചാബ് പോലീസ് പിടിച്ചെടുത്തത്. സംഭവവുമായി ബന്ധപ്പെട്ട് ബതിൻഡ പോലീസ് കേസ് രജിസ്റ്റർ ചെയ്തു. വിശദമായ അന്വേഷണം പുരോഗമിക്കുകയാണ്.