എൽഐസി പോളിസി എടുക്കാത്തവർ വളരെ വിരളമായിരിക്കും. എന്നാൽ അത്ര തന്നെ പേരുടെ പോളിസിയും മുടങ്ങിയിട്ടുണ്ടാകും. പോളിസിയുടെ നേട്ടങ്ങൾ ലഭിക്കണമെങ്കിൽ പുനരാംരഭിക്കണ്ടേതാണ്. മുടങ്ങി പോയ എൽഐസി എങ്ങനെ പുതുക്കണമെന്ന് അറിയാതെ, പോളിസിയുടെ നേട്ടങ്ങൾ എങ്ങനെ ലഭിക്കുമെന്നറിയാതെ വെട്ടിലായിരിക്കുന്നവർക്ക് പരിഹാരമിതാ..
നിശ്ചിത തീയതിക്കുള്ളിൽ പ്രീമിയം അടയ്ക്കാത്തതിനാൽ പോളിസി കാലഹരണപ്പെട്ടാൽ പോളിസി പുനരാരംഭിക്കുന്നത് വരെ പോളിസി കരാറിന്റെ നിബന്ധനകളും വ്യവസ്ഥകളും അസാധുവായി തുടരും. പ്രീമിയം മുഴുവൻ പലിശ സഹിതം അടച്ച് നിലവിലെ ആരോഗ്യ അവസ്ഥ വിശദമാക്കുന്ന രേഖകളും നൽകിയാലാണ് പോളിസി പുനരുജ്ജീവിപ്പിക്കാൻ സാധിക്കൂ.
പോളിസി ഹോൾഡർ കുറഞ്ഞത് മൂന്ന് വർഷം മുഴുവൻ പ്രീമിയം അടയ്ക്കുകയും പിന്നീട് പ്രീമിയം അടയ്ക്കുന്നത് മുടങ്ങുകയും ചെയ്താൽ അടയ്ക്കാത്ത പ്രിമീയത്തിന്റെ ആദ്യ തീയതി മുതൽ ആറ് മാസത്തിനുള്ളിൽ പ്രീമിയം ഉടമ മരണപ്പെട്ടാൽ പണം മുഴുവൻ തിരികെ ലഭിക്കും. പോളിസി ഹോൾഡർ കുറഞ്ഞത് അഞ്ച് വർഷത്തേക്ക് പ്രീമിയം അടയ്ക്കുകയും പിന്നീട് അടയ്ക്കുന്നത് നിർത്തിയാൽ ആദ്യത്തെ അടയ്ക്കാത്ത പ്രീമിയത്തിന്റെ ഡ്യൂ ഡേറ്റ് മുതൽ 12 മാസത്തിനുള്ളിൽ ഉടമ മരണപ്പെടുന്ന സാഹചര്യത്തിൽ തുക തിരികെ ലഭിക്കും.
എൽഐസി കസ്റ്റമർ കെയർ , ഇ-മെയിൽ അല്ലെങ്കിൽ തൊട്ടടുത്തുള്ള എൽഐസി ശാഖ എന്നിവയിൽ ബന്ധപ്പെട്ടാൽ പോളിസി സംബന്ധിച്ച വിവരങ്ങൾ ലഭിക്കും. പോളിസി റിവൈവൽ ഫോം പൂരിപ്പിച്ച് എൽഐസിക്ക് സമർപ്പിക്കുക. മുടങ്ങിപ്പോയ പ്രീമിയങ്ങളും പലിശയും അടയ്ക്കുക. മെഡിക്കൽ ഡിക്ലറേഷൻ സമർപ്പിച്ചും പോളിസി പുതുക്കാവുന്നതാണ്. നിലവിലെ ആരോഗ്യാവസ്ഥ സംബന്ധിച്ച് സത്യവാങ്മൂലം സമർപ്പിക്കുക.
