ഒഴിവാക്കുന്നുവെന്ന മുറവിളികള്ക്കിടെ മലയാളി താരം സഞ്ജു സാംസണുമായി സംസാരിച്ച് മുഖ്യ സെലക്ടര് അജിത് അഗാര്ക്കര്. ടൈംസ് ഓഫ് ഇന്ത്യയാണ് ഇതുസംബന്ധിച്ച വിവരം പുറത്തുവിട്ടത്. മലയാളി താരത്തിന് മുന്നില് ഇന്ത്യന് ടീമിന്റെ വാതിലുകള് അടഞ്ഞിട്ടില്ലെന്ന പ്രതീക്ഷ അദ്ദേഹം പങ്കുവച്ചതായി ടൈംസ് ഓഫ് ഇന്ത്യ റിപ്പോര്ട്ട് ചെയ്യുന്നു. 28-കാരന് ഇതുവരെയും ഇന്ത്യന് ടീമില് തുടര്ച്ചയായി കളിക്കാന് സാധിച്ചിട്ടില്ല. മഴവരും പോലെ വന്നുപോയും ഇരിക്കുകയാണെന്ന് മാത്രം. ഏഷ്യകപ്പില് സഞ്ജു ഉള്പ്പെടുമെന്ന് അവസാന നിമിഷം വരെ റൂമറുകളുണ്ടായിരുന്നെങ്കിലും സീനിയര് താരങ്ങളുടെ മടങ്ങിവരവ് അവിടെയും വെല്ലുവിളിയായി.
ഏറ്റവും ഒടുവിലെ പ്രതീക്ഷയായി ആരാധകര് കണ്ടിരുന്നത് ഓസ്ട്രേലിയന് പരമ്പരയായിരുന്നു, എന്നാല് അവിടെയും താരത്തെ തഴഞ്ഞു. ഇതോടെ ആരാധകരും കലിപ്പിലായി. ജിതേഷ് ശര്മ്മയാണ് സഞ്ജുവിന് പകരം ടീമിലെത്തിയത്. ഇതും ആരാധകരെ ചൊടിപ്പിച്ചു. ഇവരുടെ പ്രകടനങ്ങള് താരതമ്യപ്പെടുത്തിയാണ് ആരാധകര് ടീം തിരഞ്ഞെടുപ്പിനെ ചോദ്യം ചെയ്തത്.
ഏഷ്യന് ഗെയിംസില് സ്വര്ണം നേടിയ ടീമിലെ ഭൂരിഭാഗം പേരും ടീമിലെത്തിയപ്പോള് നായകനായ സൂര്യകുമാര് യാദവായിരുന്നു. ആദ്യ മത്സരത്തില് ടി20യിലെ കൂറ്റന് സ്കോര് പിന്തുടര്ന്ന് ജയിക്കാനും ഇന്ത്യക്കായി. കഴിഞ്ഞ അയര്ലന്ഡ് പര്യടനത്തിലാണ് സഞ്ജു അവസാനമായി കളിച്ചത്.വെസ്റ്റ് ഇന്ഡീസിനെതിരെ ടി20, ഏകദിന പരമ്പരയിലും സഞ്ജു കളത്തിലിറങ്ങിയെങ്കിലും സെലക്ടര്മാരെ തൃപ്തിപ്പെടുത്താന് കഴിയുന്ന തരത്തിലുള്ള പ്രകടനം താരത്തില് നിന്നുണ്ടായില്ലെന്നാണ് വിലയിരുത്തല്.
എന്നാല് ഇപ്പോള് പുറത്തുവരുന്ന വിവരങ്ങള് പ്രകാരം ടീം തിരഞ്ഞെടുക്കുന്നതിന് മുമ്പ് ചീഫ് സെലക്റ്റര് അജിത് അഗാര്ക്കാര് സഞ്ജുവുമായി സംസാരിച്ചിരുന്ന കാര്യമാണ്. മുംബൈയിലായിരുന്നു കൂടികാഴ്ചയെന്നും ടൈംസ് പറയുന്നു.
‘100 ശതമാനം എന്നല്ല, 200 ശതമാനം സഞ്ജു ഇന്ത്യയുടെ പദ്ധതകിളുടെ ഭാഗമാണ്’ എന്നാണ് അഗാര്ക്കര് താരത്തോട് വ്യക്തമാക്കിയതെന്നാണ് സൂചന. സഞ്ജുവിനോട് ഫിറ്റ്നെസ് മെച്ചപ്പെടുത്താനും സെലക്റ്റര് ആവശ്യപ്പെട്ടിട്ടുണ്ട്. ഫിറ്റ്നെസ് തന്നെയാണ് പുറത്താക്കപ്പെടാന് കാരണമായതെന്നാണ് വിലയിരുത്തല്. നിലവില് വിജയ് ഹസാരെ ടൂര്ണമെന്റ് കളിക്കുന്ന കേരള ടീമിന്റെ നായകനാണ് സഞ്ജു.
