ഇന്ത്യൻ ഫുട്ബോളിനെ പ്രശംസിച്ച് ജർമ്മൻ ഇതിഹാസ ഗോൾകീപ്പർ ഒലിവർ കാൻ. ഫുട്ബോളിൽ ഇന്ത്യയ്ക്ക് മികച്ച സാധ്യതകളുണ്ട്. അന്താരാഷ്ട്ര തലത്തിൽ ഇന്ത്യൻ ഫുട്ബോൾ വലിയ ശക്തിയായി മാറും. രാജ്യത്തെ ജനങ്ങളുടെ സ്വപ്നമായ ലോകകപ്പിൽ ഇന്ത്യ പങ്കെടുക്കുമെന്നും ഒലിവർ ഖാൻ പറഞ്ഞു. മുംബൈയിലെ ജിഡി സോമാനി സ്കൂൾ സന്ദർശിച്ച് വിദ്യാർത്ഥികളുമായി സംവദിച്ച ശേഷം സംസാരിക്കുകയായിരുന്നു അദ്ദേഹം.
ഫുട്ബോളിലെ ഇന്ത്യയുടെ സാധ്യതകൾ അനന്തമാണ്. ഇവിടുത്തെ ജനങ്ങൾക്ക് ഫുട്ബോളിനോടുള്ള സ്നേഹവും ആരാധനയും അവിശ്വസനീയമാണ്. ഇന്ത്യയുടെ സമ്പന്നമായ കായിക സംസ്കാരവും മനോഹരമായ കളിയും സമന്വയിപ്പിച്ച് ഫുട്ബോളിലേക്ക് സ്വന്തം പാത വെട്ടിത്തെളിക്കാനുള്ള സമയമാണിത്. ആഗോള വേദിയിൽ ഉടൻ തന്നെ ഇന്ത്യയൊരു വൻശക്തിയായി മാറുമെന്നും ലോകകപ്പിൽ മത്സരിക്കുമെന്നും ഞാൻ ആത്മാർത്ഥമായി വിശ്വസിക്കുന്നു. – ഒലിവർ കാൻ പറഞ്ഞു.
രാജ്യത്തെ യുവാക്കൾ ആരാധിക്കുന്ന മെസിയും നെയ്മറും റൊണാൾഡോയുമെല്ലാം മികച്ച താരങ്ങളാണ്. അവരെ റോൾമോഡൽ ആക്കുന്നതിൽ തെറ്റില്ല. പക്ഷേ ഇവിടെയുള്ള യുവാക്കൾ ഇപ്പോൾ ഇന്ത്യന് ഫുട്ബോളിന്റെ വളർച്ചയ്ക്കായി പ്രയത്നിക്കുകയാണ് വേണ്ടത്. മികച്ച കളിക്കാരെയും റോൾ മോഡലുകളെയും എന്തുകൊണ്ടാണ് ഇന്ത്യ സൃഷ്ടിക്കാത്തതെന്നും അദ്ദേഹം ചോദിച്ചു.
