ന്യൂഡൽഹി: അമേരിക്കയിൽ വിദ്യാഭ്യാസത്തിനായി പോകുന്ന ഇന്ത്യൻ വിദ്യാർത്ഥികൾക്കുള്ള വിസ അപേക്ഷയിൽ മാറ്റങ്ങൾ വരുത്തി യുഎസ് എംബസി. വിസയിൽ വരുത്തിയ പുതിയ മാറ്റങ്ങൾ ഇന്നുമുതൽ നിലവിൽ വന്നതായും എംബസി അറിയിച്ചു. യുഎസ് എംബസിയാണ് ട്വിറ്ററിലൂടെ ഇക്കാര്യങ്ങൾ അറിയിച്ചത്. എഫ്, എം, ജെ വിസ പ്രോഗ്രാമുകൾക്ക് കീഴിൽ യുഎസിൽ പഠിക്കാൻ ആഗ്രഹിക്കുന്ന വിദ്യാർത്ഥികൾ പുതിയ മാറ്റങ്ങൾ ശ്രദ്ധിക്കണമെന്നും എംബസി ട്വിറ്ററിൽ കുറിച്ചു.
എഫ്, എം, ജെ സ്റ്റുഡന്റ് വിസ അപേക്ഷകർ പ്രൊഫൈൽ രൂപീകരിക്കുമ്പോഴും വിസ അപോയിന്റ്മെന്റുകൾക്കായി തീയതികളെടുക്കുമ്പോഴും പാസ്പോർട്ടിലെ വിവരങ്ങൾ തന്നെ ഉപയോഗിക്കണം. വിസത്തട്ടിപ്പ് ഉൾപ്പെടെയുള്ളവ തടയുന്നതിന് വേണ്ടിയാണിത്. പാസ്പോർട്ടിൽ നൽകിയിരിക്കുന്ന വിവരങ്ങൾ കൃത്യമായി വിസ അപേക്ഷയ്ക്കായി നൽകിയില്ലെങ്കിൽ വിസ അപോയിന്റ്മെന്റ് റദ്ദാക്കും. അതുപോലെ തന്നെ വിസ പ്രോസസിംഗിനായി അടയ്ക്കുന്ന തുകയും നഷ്ടമാകുമെന്ന് എംബസി അറിയിച്ചു.
എഫ് അല്ലെങ്കിൽ എം വിസകൾക്കുള്ള അപേക്ഷകർ സ്റ്റുഡന്റ് ആൻഡ് എക്സ്ചേഞ്ച് വിസിറ്റർ പ്രോഗ്രാം അംഗീകാരമുള്ള ഒരു സ്കൂളിൽ രജിസ്റ്റർ ചെയ്തിരിക്കണം. യുഎസ് സ്റ്റേറ്റ് ഡിപ്പാർട്ട്മെന്റ് അംഗീകരിച്ച സ്ഥാപനത്തിൽ നിന്ന് സ്പോൺസർഷിപ്പ് ലഭിച്ചവർക്ക് മാത്രമേ ജെ വിസയ്ക്ക് അപേക്ഷിക്കാൻ സാധിക്കുകയുള്ളൂവെന്നും എംബസി അറിയിച്ചു.