ഗുവാഹത്തി: ഓസ്ട്രേലിയയ്ക്കെതിരായ ടി20 പരമ്പരയിലെ മൂന്നാം മത്സരത്തിനായി ഇന്ത്യ ഇന്നിറങ്ങും. ആദ്യ രണ്ട് മത്സരങ്ങളും ജയിച്ച ഇന്ത്യക്ക് ഇന്ന് ജയിക്കാനായാൽ പരമ്പര സ്വന്തമാകാം. അസമിലെ ബർസാപാര സ്റ്റേഡിയത്തിൽ വൈകിട്ട് ഏഴ് മണിക്കാണ് മത്സരം. സ്റ്റാർ സ്പോർട്സ് ചാനലിലും ജിയോ സിനിമയിലും മത്സരം തത്സമയം കാണാം.
ഏകദിന ലോകകപ്പ് കീരിട നേട്ടവുമായി ടി20 പരമ്പരയയ്ക്കിറങ്ങിയ ഓസീസിന് പരമ്പരയിൽ സജീവമാകാൻ ഇന്ന് ജയിച്ചേ മതിയാകൂ. ഗുവാഹത്തിയിൽ ഇന്ന് മഴ ഭീഷണി ഇല്ലെന്നതും ആരാധകർക്ക് സന്തോഷം നൽകുന്നുണ്ട്.
വിശാഖപട്ടണത്ത് അവസാന പന്തിൽ മൂന്ന് വിക്കറ്റിനും തിരുവനന്തപുരത്ത് നാൽപത്തിനാല് റൺസിനും ജയിച്ച ആത്മവിശ്വാസത്തിലാണ് സൂര്യകുമാർ യാദവും കൂട്ടരും ഇന്ന് ഗുവാഹത്തിയിൽ ഇറങ്ങുന്നത്.
ഋതുരാജ് ഗെയ്ക്വാദ്, യശസ്വി ജയ്സ്വാൾ, ഇഷാൻ കിഷൻ, സൂര്യകുമാർ യാദവ്, റിങ്കു സിംഗ് എന്നിവർ ബാറ്റിംഗിലും രവി ബിഷ്ണോയ്, അക്സർ പട്ടേൽ, പ്രസിദ്ധ് കൃഷ്ണ എന്നിവർ ബൗളിംഗിലും തിളങ്ങുന്നത് ഇന്ത്യക്ക് പ്രതീക്ഷ നൽകുന്നുണ്ട്.
