ബോളിവുഡിൽ വമ്പൻ റിലീസിന് തയ്യാറെടുക്കുന്ന ചിത്രമാണ് ‘അനിമൽ’. ചിത്രത്തിന്റെ ഒടിടി റിലീസ് വിവരങ്ങളിൽ ചിലതാണ് ഇപ്പോൾ പുറത്തുവരുന്നത്. ഡിസംബർ ഒന്നിനാണ് ചിത്രം റിലീസിനെത്തുന്നത്. ചിത്രത്തിന്റെ ഒടിടി റിലീസ് വിവരങ്ങൾ ഇങ്ങനെ..
റിലീസിനു ശേഷം എട്ട് ആഴ്ചകൾക്കുള്ളിൽ ചിത്രം ഒടിടിയിൽ എത്തുമെന്നാണ് പുറത്തുവരുന്ന റിപ്പോർട്ടുകൾ. എന്നാൽ ആരാധകർക്ക് സന്തോഷം തരുന്ന ഒരു വാർത്ത കൂടി ചിത്രത്തിന്റെ അണിയറ പ്രവർത്തകർ പുറത്തുവിടുന്നുണ്ട്. അനിമൽ തീയറ്ററിൽ റിലീസ് ചെയ്യുന്ന പതിപ്പിനെക്കാൾ 30 മിനിട്ട് ദൈർഘ്യം കൂടുതലായിരിക്കും ഒടിടിയിൽ.
ഇതോടെ ഒടിടിയിൽ എത്തുന്ന പതിപ്പിന് 3 മണിക്കൂറും 21 മിനിട്ടുമായിരിക്കും ദൈർഘ്യം. ‘കബീർ സിംഗ്’ എന്ന ചിത്രത്തിന് ശേഷം സന്ദീപ് റെഡ്ഡി വംഗയുടെ രണ്ടാമത്തെ ബോളിവുഡ് ചിത്രമാണ് ‘അനിമൽ’. രശ്മിക മന്ദാനയാണ് ചിത്രത്തിലെ നായിക. അനിൽ കപൂറും ചിത്രത്തിൽ ശ്രദ്ധേയമായ ഒരു വേഷം കൈകാര്യം ചെയ്യുന്നുണ്ട്. ബോബി ഡിയോളാണ് ചിത്രത്തിൽ പ്രതിനായക വേഷത്തിൽ എത്തുന്നത്.
അച്ഛൻ-മകൻ ബന്ധം പറയുന്ന അനിമൽ ഒരു ത്രില്ലർ ചിത്രമാണ്. വ്യത്യസ്തമായ രണ്ട് ലുക്കുകളിലാണ് രൺബീർ എത്തുന്നത്. ചിത്രത്തിന്റെ ഗാനങ്ങളും ട്രെയിലറും ആരാധകർ ഇതിനോടകം ഏറ്റെടുത്ത് കഴിഞ്ഞു.
