തീയേറ്ററുകളിലെ വിജയ യാത്ര പൂർത്തിയാക്കി ഗരുഡൻ ഒടിടിയിലെത്തി. സൂപ്പർസ്റ്റാർ സുരേഷ് ഗോപിയെ നായകനാക്കി നവാഗതനായ അരുൺ വർമ്മ സംവിധാനം ചെയ്ത ചിത്രമാണ് ഗരുഡൻ. മിഥുൻ മാനുവൽ തോമസിന്റെ തിരക്കഥയിൽ ഒരുങ്ങിയ ഗരുഡൻ ഒരു ഗംഭീര ത്രില്ലർ ചിത്രമാണ്. നവംബർ മൂന്നിനായിരുന്നു സിനിമ തീയേറ്ററുകളിൽ എത്തിയത്. 29-ാം ദിവസങ്ങൾക്ക് ശേഷമാണ് സിനിമ ഒടിടിയിൽ എത്തിയിരിക്കുന്നത്. പ്രമുഖ ഒടിടി പ്ലാറ്റ്ഫോമായ ആമസോൺ പ്രൈം വീഡിയോയിലൂടെയാണ് ചിത്രം സ്ട്രീമിംഗ് ആരംഭിച്ചിരിക്കുന്നത്.
12 വർഷത്തിന് ശേഷം സുരേഷ് ഗോപിയും ബിജു മേനോനും ഒന്നിച്ച ചിത്രം കൂടിയായിരുന്നു ഗരുഡൻ. ഏറെ കാലത്തിന് ശേഷം സുരേഷ് ഗോപി പോലീസ് വേഷത്തിൽ കസറിയ ചിത്രം എന്ന പ്രത്യേകതയും ഗരുഡനുണ്ട്. സിനിമയിൽ ബിജു മേനോൻ പ്രേക്ഷകരെ അമ്പരിപ്പിക്കുന്ന പ്രകടനമാണ് കാഴ്ചവെച്ചിരിക്കുന്നത്. അഭിരാമിയാണ് ചിത്രത്തിലെ നായിക. ജഗദീഷും ഗരുഡനിൽ ഒരു ശ്രദ്ധേയമായ വേഷം കൈകാര്യം ചെയ്തു.
ദിവ്യ പിള്ള, മാളവിക, സിദ്ധിഖ്, നിഷാന്ത് സാഗർ, തലൈവാസൽ വിജയ്, ദിലീഷ് പോത്തൻ, മേജർ രവി, ബാലാജി ശർമ, സന്തോഷ് കീഴാറ്റൂർ, രഞ്ജിത്ത് കാങ്കോൽ, ജെയ്സ് ജോസ്, ജോസുകുട്ടി, ചൈതന്യ പ്രകാശ് തുടങ്ങി വമ്പൻ താരനിര അണിനിരക്കുന്നു. മാജിക് ഫ്രെയിംസിന്റെ ബാനറിൽ ലിസ്റ്റിൻ സ്റ്റീഫനാണ് ഗരുഡൻ നിർമ്മിച്ചത്. ചിത്രത്തിന്റെ ക്യാമറ കൈകാര്യം ചെയ്തിരിക്കുന്നത് അജയ് ഡേവിഡ് കാച്ചപ്പിള്ളിയാണ്. ജേക്സ് ബിജോയ് ആണ് സംഗീതം ഒരുക്കിയിരിക്കുന്നത്.
