പച്ചക്കറി വാങ്ങാൻ പോയാൽ മറക്കാതെ വാങ്ങുന്ന പച്ചക്കറിയാണ് ബീൻസ്. തോരനായും മെഴുക്കുപുരട്ടിയായും കഴിക്കുന്ന ബീൻസിന്റെ ഗുണങ്ങളെ കുറിച്ച് പലർക്കും അറിയില്ലെന്നതാണ് വാസ്തവം. ഏകദേശം 130 ഇനം ബീൻസ് ഉണ്ടെന്നാണ് പറയുന്നത്. ആന്റി ഇൻഫ്ളമേറ്ററി ഗുണങ്ങൾ അടങ്ങിയ ഇത് വിറ്റാമിൻ എ, സി, കെ, ബി 6, ഫോളിക് ആസിഡ്, കാത്സ്യം, ഇരുമ്പ്, പൊട്ടാസ്യം തുടങ്ങിയവയുടെ കലവറയാണ്. ഫൈബറും ധാരാളം അടങ്ങിയ ഗ്രീൻ ബീൻസിൽ കലോറിയും കൊഴുപ്പും വളരെ കുറവാണ്.
നാരുകളും ഒമേഗ 3 ഫാറ്റുകളുടെയും ഉറവിടം കൂടിയാണ് ബീൻസ്. ചർമ്മത്തിന്റെയും തലമുടിയുടെയും നഖങ്ങളുടെയും വരെ ആരോഗ്യത്തിന് മികച്ചതാണ് ബീൻസ്. ബീൻസിന്റെ പത്ത് ആരോഗ്യ ഗുണങ്ങൾ അറിയാം..
1) പ്രമേഹമുള്ളവർ തീർച്ചയായും കഴിക്കേണ്ട പച്ചക്കറിയാണ് ബീൻസ്. ബീൻസിന്റെ ഗ്ലൈസമിക് ഇൻഡക്സ് കുറവാണ്. രക്തത്തിലെ പഞ്ചസാരയുടെ അളവ് നിയന്ത്രിക്കാൻ ബീൻസ് സഹായിക്കുന്നു.
2) മുടിക്കൊഴിച്ചിലുള്ളവർക്കും നഖം പൊട്ടുന്നവർക്കും ബീൻസ് ഭക്ഷണത്തിൽ ഉൾപ്പെടുത്താവുന്നതാണ്. വിളർച്ചയെ തടയാനും ശരീരത്തിന് ആവശ്യമായ ഊർജ്ജം നൽകാനും ബീൻസിന് കഴിയും.
3) സ്ഥിരമായി ബീൻസ് ഭക്ഷണത്തിൽ ഉൾപ്പെടുത്തുന്നത് അർബുദ സാധ്യതയെ കുറയ്ക്കുന്നതായി പഠനങ്ങൾ പറയുന്നു. ഹെറോസൈക്ലിക് അമീനുകൾ ഇതിൽ ധാരാളമുണ്ട്. അർബുദത്തെ തടയാൻ ഇതിന് കഴിയും.
4) ഹൃദയത്തെ പൊന്നുപോലെ കാക്കാൻ ആഗ്രഹിക്കുന്നവർക്കും ബീൻസിനെ കൂട്ടുപിടിക്കാവുന്നതാണ്. ബീൻസിൽ ധാരാളം കാൽസ്യവും ഹൃദയത്തെ സംരക്ഷിക്കുന്ന ഫ്ലവനോയ്ഡുകളും ഉണ്ട്. ധമനികളിൽ രക്തം കട്ട പിടിക്കുന്നതിനെ തടയാൻ ഇത് സഹായിക്കുന്നു.
5) എല്ലുകളുടെ ബലക്ഷയത്തെ തടയാൻ ബീൻസ് സഹായിക്കും. എല്ലുകളിൽ കാണുന്ന പ്രധാന നോൺ കൊളാജൻ പ്രോട്ടീനാണ് ഓസ്റ്റിയോകാൽസ്. ബീൻസിൽ ധാരളമായി ഇത് അടങ്ങിയിരിക്കുന്നു.
6) നാരുകളാൽ സമ്പന്നമാണ് ബീൻസ്. ദഹന പ്രശ്നങ്ങളിൽ നിന്ന് രക്ഷ നേടാനും മലബന്ധനം അകറ്റാനും ബീൻസിലെ നാരുകൾ സഹായിക്കും.
7) ഗർഭസ്ഥ ശിശുവിന്റെ ആരോഗ്യത്തിനും ബീൻസ് സഹായിക്കും. ഒരു കപ്പ് ബീൻസിൽ ദിവസവും ആവശ്യമായതിന്റെ പത്തുശതമാനം ഫോളിക് ആസിഡും 6 ശതമാനം അയണും അടങ്ങിയിട്ടുണ്ട്. അതുകൊണ്ട് ഗർഭിണികൾ ബീൻസ് കഴിക്കുന്നത് നല്ലതാണ്.
8) കാഴ്ചശക്തിക്കും ബീൻസ് നല്ലതാണ്. കാഴ്ചശക്തി വർദ്ധിപ്പിക്കുന്ന ആന്റി ഓക്സിഡന്റുകളായ ല്യൂട്ടിൻ, സീസ്വാന്തിൻ തുടങ്ങിയവ ബീൻസിലുണ്ട്.
9) ബീൻസിൽ കലോറി,സോഡിയം, സാച്ചുറേറ്റഡ് ഫാറ്റ്, കൊളസ്ട്രോൾ എന്നിവ വളരെ കുറവാണ്. അതുകൊണ്ട് തന്നെ ആവോളം ഭക്ഷണത്തിൽ ഉൾപ്പെടുത്താവുന്നതാണ്.
10) വൈറ്റമിനുകളായ നിയാസിൻ, തയാമിൻ ഇവ ശരീരത്തിലെ അണുബാധകൾ തടയാനും വിളർച്ചയെ തടയാനും സഹായിക്കുന്നു.
