ഏറെ നാളത്തെ കാത്തിരിപ്പിനൊടുവിൽ ശിവകാർത്തികേയൻ ചിത്രം ‘അയലാൻ’ പൊങ്കൽ റിലീസിന് ഒരുങ്ങുകയാണ്. സയൻസ് ഫിക്ഷനിൽ ഉൾപ്പെടുന്ന ചിത്രത്തിന്റെ പോസ്റ്റ് പ്രൊഡക്ഷൻ ജോലികളെല്ലാം അവസാനഘട്ടത്തിലാണ്. അയലാന്റെ ഓഡിയോ ലോഞ്ച് ഡിസംബർ 26-ന് ചെന്നൈയിൽ വച്ച് നടക്കുമെന്ന് അണിയറ പ്രവർത്തകർ അറിയിക്കുന്നത്.
ചിത്രത്തിനായി സംഗീതം ഒരുക്കിയിരിക്കുന്നത് എആർ റഹ്മാനാണ്. ചിത്രത്തിലെ ഒരു സിംഗിൾ ട്രാക്ക് ഇതിന് മുമ്പ് റിലീസ് ആയിരുന്നു. ആകെ നാല് ഗാനങ്ങളാണ് അയലാനിൽ ഉള്ളത്. ഓഡിയോ ലോഞ്ചിൽ ചിത്രത്തിലെ പാട്ടുകൾ ഉൾപ്പെടുത്തി എആർ റഹ്മാന്റെ മെഗാ ഷോയും ഉണ്ടാകും.
ശിവകാർത്തികേയന്റെ സിനിമാ ജീവിതത്തിലെ ഏറ്റവും മുതൽമുടക്കുള്ള ചിത്രമാണ് അയലാൻ. സിനിമയിൽ ശിവകാർത്തികേയനൊപ്പം പ്രധാന വേഷത്തിൽ ഒരു ഏലിയനും പ്രത്യക്ഷപ്പെടുന്നുണ്ട്. മികച്ച് വിഎഫ്എക്സ് അനുഭവം പ്രേക്ഷകർക്ക് പ്രതീക്ഷിക്കാമെന്നാണ് ചിത്രത്തിന്റെ അണിയറപ്രവർത്തകർ അവകാശപ്പെടുന്നത്.
രവികുമാർ സംവിധാനം ചെയ്യുന്ന ചിത്രത്തിൽ രാകുൽ പ്രീത് സിംഗ്, യോഗി ബാബു, ഭാനുപ്രിയ, ഇഷ കോപിക്കർ, ബാല ശരവണൻ തുടങ്ങിയവരും അഭിനയിക്കുന്നുണ്ട്.
