മലയാളികൾക്ക് ഏറെ പ്രിയപ്പെട്ട താരമാണ് മിഥുൻ. സമൂഹമാദ്ധ്യമങ്ങളിലെ വീഡിയോകളിലൂടെ മിഥുന്റെ കുടുംബവും പ്രേക്ഷകർക്ക് സുപരിചിതമാണ്. ഈ വർഷാരംഭത്തിൽ മിഥുന് ബെല്‍സ് പാഴ്സി രോഗം ബാധിച്ചിരുന്നു. താരം തന്നെയാണ് ആരാധകരെ ഇക്കാര്യം അറിയിച്ചത്. പിന്നീട് ആരോഗ്യവാനായി മിഥുൻ തിരിച്ചെത്തുകയും ചെയ്തിരുന്നു. ഇപ്പോൾ മിഥുനും കുടുംബവും തിരുപ്പതിയിലെത്തി ദർശനം നടത്തിയിരിക്കുകയാണ്. മിഥുന് വേഗം സുഖം പ്രാപിക്കാനായി ഭാര്യ ലക്ഷ്മി നേർന്ന വഴിപാട് നടത്താനായിരുന്നു അവർ തിരുപ്പതിയിലെത്തിയത്.
ഇതിന്റെ ചിത്രങ്ങളാണ് ഇപ്പോൾ സമൂഹമാദ്ധ്യമങ്ങളിൽ മിഥുൻ പങ്കുവച്ചിരിക്കുന്നത്. തിരുപ്പതിയിലെ നേർച്ചയുടെ ഭാഗമായി ഭാര്യ ലക്ഷ്മി മൊട്ടയടിച്ചുവെന്ന കാര്യവും താരം അറിയിച്ചു. തന്റെ ‘ചിഞ്ചുകുട്ടി മൊട്ട കുട്ടി’ ആയെന്ന് പറഞ്ഞ് ലക്ഷ്മിയെ ചേർത്തുപിടിച്ച ചിത്രങ്ങളും പങ്കുവച്ചിട്ടുണ്ട്.
‘Mottai Boss Lakshmi ❤️❤️😍 എന്റെ Bells Palsy പോരാട്ട ദിനങ്ങൾ നിങ്ങളിൽ കുറെ പേർക്കെങ്കിലും അറിയാം എന്ന് തോന്നുന്നു . അന്ന് നിങ്ങൾ ഓരോരുത്തരുടെയും പ്രാർത്ഥന കൊണ്ട് തന്നെ ആണ് ഇന്ന് കാണുന്ന രൂപത്തിൽ തിരികെ എത്താൻ കഴിഞ്ഞത് .പക്ഷെ എന്റെ ഭാര്യ ഒരു ലെവൽ കൂടുതൽ പ്രാർത്ഥിച്ചിരുന്നു ; ആ അസുഖം മാറാൻ ഭാര്യ നേർന്നതാണ് തിരുപ്പതിയിൽ മുടി കൊടുക്കാം എന്ന്. അങ്ങനെ ചിഞ്ചുകുട്ടി മൊട്ട കുട്ടി ആയി.’- മിഥുൻ കുറിച്ചു.
2023 മർച്ച് ആദ്യവാരമാണ് മിഥുന് ബെൽസ് പാഴ്സി രോഗം പിടിപെട്ടത്. താൽക്കാലികമായി മുഖം ഒരു വശത്തേക്ക് കോടുന്ന രോഗാവസ്ഥയാണിത്. മാർച്ച് അവസാനം ആയപ്പോഴേക്കും മിഥുൻ സുഖം പ്രാപിച്ചിരുന്നു.
