ദുബായ്: ഇസ്രായേൽ പ്രസിഡന്റ് ഐസക് ഹെർസോഗുമായി കൂടിക്കാഴ്ച നടത്തി പ്രധാനമന്ത്രി നരേന്ദ്രമോദി. ദുബായിൽ നടക്കുന്ന ലോക കാലാവസ്ഥാ ഉച്ചകോടിക്കിടെ ആയിരുന്നു കൂടിക്കാഴ്ച.
ഇസ്രായേൽ-ഹമാസ് സംഘർഷത്തെ കുറിച്ച് ഇരുനേതാക്കളും ചർച്ച ചെയ്തു. വിഷയം ചർച്ചകളിലൂടെ ശാശ്വതമായി പരിഹരിക്കണം എന്ന നിലപാട് ഇന്ത്യ അറിയിച്ചു. ഒക്ടോബർ ഏഴിന് ഇസ്രായേലിന് നേരെ ഉണ്ടായ ആക്രമണത്തിൽ പ്രധാനമന്ത്രി ദുഃഖം പ്രകടിപ്പിച്ചു.
തടവുകാരെ മോചിപ്പിച്ചത് സ്വാഗതം ചെയ്യുകയും മാനുഷിക സഹായം എത്തുന്നത് തുടരണം എന്ന നിലപാട് പ്രധാനമന്ത്രി അറിയിക്കുകയും ചെയ്തു. ദ്വിരാഷ്ട്ര പരിഹാരം എന്നതിനാണ് ഇന്ത്യയുടെ ഊന്നലെന്നും നരേന്ദ്രമോദി കൂട്ടിച്ചേർത്തു.