മലയാള സിനിമയിൽ ഏക്കാലത്തും ഓർമ്മിക്കപ്പെടുന്ന ചില വില്ലന്മാരുണ്ട്. മലയാളികളുടെ സ്വന്തം സൂപ്പർ സ്റ്റാറുകളെ പോലും വിറപ്പിച്ച ചില വില്ലൻ കഥാപാത്രങ്ങൾ. സ്ക്രീൻ പ്രസൻസും കട്ട വില്ലനിസവും ലുക്കും കൊണ്ട് മലയാള സിനിമാ പ്രേമികളുടെ മനം കവർന്ന പ്രതിനായകന്മാർ. പെട്ടന്ന് അങ്ങനെ ചില പേരുകൾ ചോദിച്ചാൽ മലയാളികളുടെ മനസിലേയ്‌ക്ക് ഓടിയെത്തുന്ന ചില കഥാപാത്രങ്ങളാണ് സ്വാമിയും നരേന്ദ്രഷെട്ടിയുമെല്ലാം.
ഒരു കാലത്ത് നമ്മെ ഭയപ്പെടുത്തിയ വില്ലന്മാരെ വർഷങ്ങൾക്കിപ്പുറം കണ്ടാൽ എങ്ങനെയിരിക്കും. അത്തരത്തിലുള്ള ഒരു ഫോട്ടോയാണ് ഇപ്പോൾ സമൂഹമാദ്ധ്യമങ്ങളിലും ട്രോൾ പേജുകളിലുമെല്ലാം പ്രത്യക്ഷപ്പെടുന്നത്. അത് മറ്റാരുടെയുമല്ല, ജയരാജിന്റെ സംവിധാനത്തിൽ പുറത്തിറങ്ങിയ മമ്മൂട്ടിയുടെ സൂപ്പർ ഹിറ്റ് ചിത്രം ജോണി വാക്കറിലെ വില്ലൻ തന്നെ.
ജോണി വാക്കറിലെ സ്വാമി എന്ന വില്ലൻ കഥാപാത്രത്തെ ആർക്കും മറക്കാൻ കഴിയില്ല. നീട്ടി വളർത്തി മുടിയും ചെവിയിൽ കമ്മലുമിട്ട് പള്ളിമണികളുടെ പശ്ചാത്തല സംഗീതത്തിന്റെ അകമ്പടിയിൽ കാറിൽ വന്നിറങ്ങുന്ന സ്വാമി. കമാൽ ഗൗറാണ് സ്വാമി എന്ന വില്ലൻ കഥാപാത്രത്തെ അനശ്വരമാക്കിയ നടൻ. പേരിൽ സ്വാമി ഉണ്ടെങ്കിലും സിനിമയിലെ കഥാപാത്രം വളരെ ക്രൂരനായിരുന്നു. എന്നാൽ ഇന്ന് കമാൽ ഗൗറിന് സിനിമയിലെ കഥാപാത്രത്തിന്റെ പേരുമായി വളരെ സാമ്യമുണ്ട്.
30 വർഷങ്ങൾക്കു മുൻപ് നമ്മൾ സിനിമയിൽ കണ്ട് ഭയന്ന ആ വില്ലൻ ഇപ്പോൾ കർണാടകയിലെ ഗോകർണത്തുണ്ട്. സിനിമയിലെ പേര് അന്വർത്ഥമാക്കുന്ന തരത്തിൽ ഒരു സ്വാമിയ്‌ക്ക് തുല്യമായ ജീവിതമാണ് അദ്ദേഹം നയിക്കുന്നത്. ആത്മീതയുടെ വഴിയിലാണ് കമാൽ. ഗോകർണത്തിലെ നിർവാണ ബീച്ചിനരികിലാണ് ആശ്രമ തുല്യമായ അദ്ദേഹത്തിന്റെ വീട്. കൂട്ടിന് കുറേ പട്ടികളും.
