ന്യൂഡൽഹി: അടുത്തവർഷത്തെ ഇന്ത്യൻ പ്രീമിയർ ലീഗ് (ഐപിഎൽ) സീസണിന് മുന്നോടിയായുള്ള മിനി താരലേലം ദുബായിൽ നടക്കുമെന്ന് ബിസിസിഐ അറിയിച്ചു. ഡിസംബർ 10-നാണ് താരലേലം നടക്കുക. ഇത് ആദ്യമായാണ് ഐപിഎൽ താരലേലം ഇന്ത്യയ്‌ക്ക് പുറത്ത് നടത്തുന്നത്.
1166 കളിക്കാർ ഈ ലേലത്തിൽ രജിസ്റ്റർ ചെയ്തിട്ടുണ്ട്. 2023 ലോകകപ്പ് താരങ്ങളായ മിച്ചൽ സ്റ്റാർക്ക്, പാറ്റ് കമ്മിൻസ്, ട്രാവിസ് ഹെഡ്, ഡാരിൽ മിച്ചൽ, രചിൻ രവീന്ദ്ര എന്നിവർ ലേലത്തിൽ പങ്കെടുക്കും. ലോകകപ്പ് ജേതാക്കളായ ഓസീസ് താരങ്ങളുടെ അടിസ്ഥാന വില 2 കോടി രൂപയും രചിൻ രവീന്ദ്രയുടേത് 50 ലക്ഷവുമാണ്.
1,166 കളിക്കാരിൽ 830 പേർ ഇന്ത്യൻ താരങ്ങളും 336 പേർ വിദേശ താരങ്ങളുമാണ്. 212 ക്യാപ്ഡ്, 909 അൺക്യാപ്പ്ഡ്, 45 അസോസിയേറ്റ് കളിക്കാരെ പട്ടികയിൽ ഉൾപ്പെടുത്തിയിട്ടുണ്ട്.
ലേലത്തിൽ നിന്ന് 30 വിദേശ താരങ്ങൾ ഉൾപ്പടെ 77 സ്ലോട്ടുകളിലേക്കാണ് ഐപിഎൽ ക്ലബ്ബുകൾ താരങ്ങളെ സ്വന്തമാക്കുക.
2024-ലെ ലോക്‌സഭാ തിരഞ്ഞെടുപ്പിന്റെ തീയതി പ്രഖ്യാപിച്ചതിന് ശേഷം മാത്രമേ ഐപിഎല്ലിന്റെ സമയക്രമങ്ങൾ പ്രഖ്യാപിക്കുവെന്നും റിപ്പോർട്ടുകളുണ്ട്.
