ജോലിയിൽ പ്രവേശിക്കുന്നതിനു മുമ്പ് എല്ലാവരും അഭിമുഖീകരിക്കേണ്ടി വരുന്ന ഘട്ടമാണ് ഇന്റർവ്യു. ജോലിക്ക് താത്പര്യമറിയിച്ച ഉദ്യോഗാർത്ഥി പ്രസ്തുത പ്രവൃത്തിക്ക് അനുയോജ്യരാണോയെന്ന് മനസിലാക്കാൻ ഇതുവഴി സ്ഥാപനത്തിന് സാധിക്കുന്നു. കഴിവുകൾ പരിശോധിക്കുന്നതിനൊപ്പം നിങ്ങളുടെ വ്യക്തിത്വ രിശോധനയും അഭിമുഖത്തിൽ അളക്കുന്നതാണ്. നല്ലൊരു ജോലി സ്വപ്നം കണ്ട് ഇന്റർവ്യൂന് പോവാൻ നിൽക്കുന്നവരാണ് നിങ്ങളെങ്കിൽ ഇത്തരം ഭക്ഷണങ്ങൾ കഴിച്ച് പോവാതിരിക്കാൻ പ്രത്യേകം ശ്രദ്ധിക്കുക.
ഉള്ളി/ വെളുത്തുള്ളി
ഇന്ത്യൻ വിഭവങ്ങളിൽ ധാരാളമായി ഉപയോഗിക്കുന്ന പച്ചക്കറികളാണ് ഉള്ളിയും വെളുത്തുള്ളിയും. എന്നാൽ ഒരു ജോലിയുടെ അഭിമുഖത്തിന് പോവുമ്പോൾ ഇത്തരം ഭക്ഷണങ്ങൾ ഒഴിവാക്കാൻ പ്രത്യേകം ശ്രദ്ധിക്കേണ്ടതാണ്. ഇവ കഴിച്ച് അഭിമുഖത്തിന് ഇരിക്കുമ്പോൾ രൂക്ഷമായ വായ് നാറ്റത്തിന് ഇടവയ്ക്കും. ഇത് സ്ഥാപനത്തിന്റെ അധികൃതർക്ക് നിങ്ങളോടുള്ള മതിപ്പ് കുറയാൻ ഇടയാകുന്നു. ഇതിനുപുറമെ ഇത്തരം ഭക്ഷണങ്ങൾ കഴിക്കുന്നത് നെഞ്ചെരിച്ചിൽ, വയറെരിച്ചിൽ തുടങ്ങിയവയ്ക്കും കാരണമാകുന്നു.
വറുത്ത ഭക്ഷണങ്ങൾ
അഭിമുഖത്തിന് പോവുമ്പോൾ വറുത്തുപൊരിച്ച ഭക്ഷണങ്ങൾ കഴിക്കുന്നത് പരമാവധി ഒഴിവാക്കണം. ഇവ കഴിക്കുന്നത് ആരോഗ്യ പ്രശ്നങ്ങൾ ഉണ്ടാക്കാനും ദഹന പ്രശ്നത്തിനും കാരണമാകുന്നു. വയറു വേദനയും അസ്വസ്ഥതയും ഉണ്ടാവാനുള്ള സാദ്ധ്യതയേറെയാണ്. അതിനാൽ ഇത്തരം ഭക്ഷണങ്ങൾ പരമാവധി ഒഴിവാക്കാൻ പ്രത്യേകം ശ്രദ്ധിക്കുക.
കഫീൻ
ഒരു അഭിമുഖത്തിന് പോവുന്നതിന് മുമ്പ് നിങ്ങൾ ഒഴിവാക്കേണ്ട മറ്റൊരു കാര്യമാണ് കഫീൻ അടങ്ങിയ ഭക്ഷണങ്ങൾ. ഇവ നിങ്ങൾക്ക് ഊർജ്ജം നൽകുമെങ്കിലും കഫീൻ ഉത്കണ്ഠ വർദ്ധിപ്പിക്കുന്നതിനും കാരണമാകുന്നു. ഇത് നിങ്ങളെ സമ്മർദ്ദത്തിലാക്കുകയും ശ്രദ്ധകേന്ദ്രീകരിക്കാൻ സാധിക്കാതെ വരുകയും ചെയ്യുന്നു. ഇതിനൊപ്പം ഒഴിവാക്കേണ്ട മറ്റൊരു കാര്യമാണ് കാർബണേറ്റഡ് പാനീയങ്ങൾ.
