2024 ലെ ഐപിഎല്ലിൽ ഡൽഹി ക്യാപിറ്റൽസ് ജഴ്‌സിയിൽ ഋഷഭ് പന്തിനെ കാണാനാകുമെന്ന അഭ്യൂഹങ്ങൾ വീണ്ടും ശക്തമാകുന്നു. ബെംഗളൂരുവിലെ നാഷണൽ ക്രിക്കറ്റ് അക്കാദമിയിലുള്ള പന്തിന്റെ വീഡിയോയാണ് ഇപ്പോൾ സമൂഹമാദ്ധ്യമങ്ങളിൽ വൈറലാകുന്നത്. വാഹനാപകടത്തിൽ ഗുരുതര പരിക്കേറ്റ് വിശ്രമത്തിലായിരുന്ന പന്ത് ക്രിക്കറ്റിലേക്ക് സജീവമായി എത്താനുള്ള മുന്നൊരുക്കത്തിലാണ്. ഭാഗമായി ജിമ്മിൽ വർക്കൗട്ട് ചെയ്യുന്ന താരത്തിന്റെ വീഡിയോയും ചിത്രങ്ങളുമാണ് സമൂഹമാദ്ധ്യമങ്ങളിൽ വൈറലായിരിക്കുന്നത്.
പരിക്കിനെ തുടർന്ന് കാൽമുട്ടിന് ശസ്ത്രക്രിയ വേണ്ടി വന്ന താരം ജിമ്മിൽ ഫിറ്റ്‌നസ് വീണ്ടെടുക്കുന്നതിനായി പ്രത്യേക ട്രെയിനർക്ക് കീഴിലാണ് വ്യായാമങ്ങൾ ചെയ്യുന്നത്. താരത്തിന്റെ കാലിലുണ്ടായിരുന്ന ബാൻഡേജ് നീക്കിയതായി ചിത്രത്തിൽ നിന്ന് മനസിലാക്കാം. അപ്പർ ബോഡിയിലേക്ക് വർക്ക് ഔട്ട് ചെയ്യുന്നതും വീഡിയോയിൽ കാണാം.
നേരത്തെ ഡൽഹി ക്യാപിറ്റൽസിന്റെ ഡയറക്ടറായ സൗരവ് ഗാംഗുലി ഋഷഭ് പന്ത് സുഖം പ്രാപിച്ചതായും ഡിസിയെ നയിക്കുമെന്ന് പ്രതീക്ഷിക്കുന്നതായും വ്യക്തമാക്കിയിരുന്നു. കൊൽക്കത്തയിലെ ഡൽഹി ക്യാപിറ്റൽസിന്റെ ഐപിഎല്ലിന് മുമ്പായുള്ള ക്യാമ്പുകളിലൊന്നിൽ താരം പങ്കെടുത്തെങ്കിലും ബാറ്റ് ചെയ്യുകയോ ഫീൽഡ് ചെയ്യുകയോ ചെയ്തില്ല. നിലവിൽ എൻസിഎയിൽ ഫീസിയോ തെറാപിസ്റ്റ്മാരുടെയും പരിശീലകരുടെയും നീരിക്ഷണത്തിലാണ് ഋഷഭ് പന്ത്.
