ന്യൂഡൽഹി: ഇൻഡി മുന്നണിയുടെ പ്രധാനമന്ത്രി സ്ഥാനാർത്ഥി തർക്കം രൂക്ഷമാകുന്നതിനിടെ ഉദ്ധവിന്റെ പേര് ഉയർത്തിക്കാട്ടി ശിവസേന ഉദ്ധവ് പക്ഷം നേതാവ് സഞ്ജയ് റാവത്ത്. പ്രധാനമന്ത്രിയാകാൻ ഉദ്ധവ് താക്കറെ അനുയോജ്യനാണെന്നാണ് സഞ്ജയ് റാവത്തിന്റെ വാദം. എന്നാൽ മുന്നണിയിൽ ഒരു തർക്കം വേണ്ടെന്ന് കരുതി താൻ ഒന്നും പറയുന്നില്ലെന്നും അദ്ദേഹം പറഞ്ഞു.
തിരഞ്ഞെടുപ്പിന് ഉറപ്പായും ഒരു മുഖമുണ്ടാകണം. ഉദ്ധവ് ഒരു ഹിന്ദുത്വവാദിയും ദേശീയ മുഖവുമാണെന്നും അദ്ദേഹം പറഞ്ഞു. എന്നാലും മുന്നണിയുടെ തീരുമാനം വരണം. മുന്നണി അംഗീകരിച്ചാൻ പ്രധാനമന്ത്രി സ്ഥാനാർത്ഥിയാകാം. പ്രധാനമന്ത്രിയാകാൻ ഉദ്ധവ് അനുയോജ്യനാണ്. സഖ്യത്തിൽ വിള്ളലുണ്ടാകാൻ സാധ്യതയുള്ളതിനാൽ ഒന്നും പുറത്ത് പറയാൻ ആഗ്രഹിക്കുന്നില്ലെന്നും റാവത്ത് പറഞ്ഞു
പ്രധാനമന്ത്രി സ്ഥാനാർത്ഥി വിഷയത്തിൽ വലിയ അനിശ്ചിതത്വമാണ് മുന്നണിയിൽ തുടരുന്നത്. മമതയും നിതീഷുമടക്കം പ്രദേശിക പാർട്ടി നേതാക്കന്മാർ പ്രധാനമന്ത്രി സ്ഥാനാർത്ഥിയാകാൻ തയ്യാറെടുപ്പിലാണ്. അതേസമയം, ഇൻഡി മുന്നണി യോഗത്തിൽ നിന്ന് പ്രതിപക്ഷ പാർട്ടികളിൽ പലരും വിട്ടുനിന്നു. തിരഞ്ഞെടുപ്പിലെ കോൺഗ്രസിന്റെ തോൽവിക്ക് പിന്നാലെ മുന്നണിയിലെ ഭിന്നത പ്രകടമായിരിക്കുകയാണ്.