ഷാറൂഖ് ഖാൻ നായകനായി റിലീസിനൊരുങ്ങുന്ന ഏറ്റവും പുതിയ ചിത്രമാണ് ഡുങ്കി. ഡിസംബർ 21 നാണ് ചിത്രം തിയേറ്ററുകളിൽ എത്തുന്നത്. ഇപ്പോഴിതാ സിനിമയുടെ റിലീസിന് മുന്നോടിയായി ജമ്മു കശ്മീരിലെ വൈഷ്ണോദേവി ക്ഷേത്രം സന്ദർശിച്ചിരിക്കുകയാണ് താരം. ഈ വർഷം മൂന്നാം തവണയാണ് അദ്ദേഹം വൈഷ്ണോദേവി ക്ഷേത്രം സന്ദർശിക്കുന്നത്. നേരത്തെ പത്താൻ, ജവാൻ സിനിമകളുടെ റിലീസിന് മുന്നോടിയായും ഷാറൂഖ് ഖാൻ വൈഷ്‌ണോ ദേവി ക്ഷേത്രത്തിൽ ദർശനം നടത്തിയിരുന്നു.
View this post on Instagram
ഷാറൂഖ് ഖാൻ വൈഷ്ണോദേവി ക്ഷേത്ര ദർശനം നടത്തുന്നതിന്റെ ചിത്രങ്ങളും വീഡിയോകളും ഇതിനോടകം സമൂഹമാദ്ധ്യമങ്ങളിൽ വൈറലാണ്. ഏതാനും പോലീസ് ഉദ്യോഗസ്ഥർക്കും തന്റെ സുരക്ഷാ ഉദ്യോഗസ്ഥർക്കും ഒപ്പമാണ് അദ്ദേഹം ക്ഷേത്രത്തിൽ എത്തിയത്. മാനേജർ പൂജാ ദദ്‌ലാനിയും അദ്ദേഹത്തെ അനുഗമിച്ചു.
രാജ് കുമാർ ഹിരാനിയാണ് ഡുങ്കി സംവിധാനം ചെയ്യുന്നത്. ചിത്രത്തിൽ തപ്‌സി പന്നു ആണ് ഷാറൂഖ് ഖാന്റെ നായികയായി എത്തുന്നത്. വിക്കി കൗശാലും ഡങ്കിയിൽ ശ്രദ്ധേയമായ ഒരു വേഷത്തിൽ എത്തുന്നു. കഴിഞ്ഞ ദിവസം പുറത്തുവിട്ട ചിത്രത്തിന്റെ ട്രെയിലർ ഇതിനോടകം നിരവധിപ്പേരാണ് കണ്ടത്. ഒപ്പം ‘ഒ മാഹി’ എന്ന ഗാനവും ആരാധകർ ഏറ്റെടുത്ത് കഴിഞ്ഞു.
അതേസമയം ഡങ്കി എന്ന വാക്കിന്റെ അർത്ഥം എന്താണെന്ന തരത്തിൽ നിരവധി ചോദ്യങ്ങൾ ആരാധകർക്കിടയിൽ നിന്ന് ഉയർന്നു വന്നിരുന്നു. ഡങ്കി എന്നാൽ ‘പ്രിയപ്പെട്ടവരിൽ നിന്ന് അകന്നിരിക്കുക’ എന്നാണ് അർത്ഥമെന്ന് ആരാധകർക്ക് മറുപടിയുമായി ഷാറൂഖും എത്തി. എക്‌സിലൂടെയായിരുന്നു താരത്തിന്റെ പ്രതികരണം.
