ദക്ഷിണാഫ്രിക്കയ്‌ക്ക് എതിരായ മത്സരത്തിനിടെ പരിക്കേറ്റ ഇന്ത്യയുടെ ടി20 നായകൻ സൂര്യകുമാർ യാദവിന്റെ നിലയിൽ ആശങ്ക. ജൊഹന്നാസ്ബെർഗിലെ മത്സരത്തിൽ തകർപ്പൻ സെഞ്ച്വറിക്ക് പിന്നാലെ ഫീൾഡ് ചെയ്യുന്നതിനിടെയാണ് ഇടതു കാലിന്റെ ആംഗിളിന് പരിക്കേറ്റത്. ദക്ഷിണാഫ്രിക്കയുടെ മറുപടി ബാറ്റിംഗിനിടെ മൂന്നാം ഓവറിലായിരുന്നു സംഭവം.
നടക്കാൻ കഴിയാതിരുന്ന താരത്തെ തോളിലെടുത്താണ് ഫിസിയോയും സംഘവും ഗ്രൗണ്ടിന് പുറത്തെത്തിച്ചത്. പിന്നീട് ടീമിനെ രവീന്ദ്ര ജഡേജയാണ് നയിച്ചത്. മത്സരത്തിൽ ഇന്ത്യ 106 റൺസിന്റെ വിജയമാണ് സ്വന്തമാക്കിയത്. 202 റൺസ് വിജയലക്ഷ്യം പിന്തുടർന്ന ദക്ഷിണാഫ്രിക്ക 13.5 ഓവറിൽ ഓൾഔട്ടാവുകയായിരുന്നു.
അതേസമയം മത്സര ശേഷം പരിക്കിന്റെ കാര്യം വിശദീകരിച്ച് സൂര്യകുമാർ തന്നെ രംഗത്തെത്തി. ഇപ്പോൾ ഓക്കെയാണ്. എനിക്കിപ്പോൾ നടക്കാനാകുന്നുണ്ട്. പരിക്ക് അത്ര ഗുരുതരമല്ല എന്നാണ് തോന്നുന്നത്- സൂര്യകുമാർ പറഞ്ഞു. അടുത്ത മത്സരത്തിൽ താരം കളിക്കുന്ന കാര്യം വരും ദിവസങ്ങളിൽ വ്യക്തമാകും.
