ക്രിക്കറ്റ് ഇതിഹാസം സച്ചിന് പിന്നാലെ മഹേന്ദ്ര സിംഗ് ധോണിയുടെ ജഴ്സി നമ്പരും ബിസിസിഐ പിൻവലിക്കുന്നു. ഇന്ത്യക്ക് മൂന്ന് ഐസിസി കിരീടങ്ങൾ നൽകിയ ക്യാപ്റ്റന് ആദരവ് നൽകുന്നതിന്റെ ഭാഗമായാണ് തീരുമാനം. ഇനി ധോണിയുടെ ഐക്കോണിക്ക് നമ്പരായ 7 ഇന്ത്യൻ ടീമിൽ ആർക്കും ലഭിക്കില്ല.നേരത്തെ സച്ചിന്റെ പത്താം നമ്പരും പിൻവലിച്ചിരുന്നു.
അതേസമയം ഷാർദൂൽ താക്കൂറിന് ഒരു മത്സരത്തിൽ പത്താം നമ്പർ നൽകിയപ്പോൾ വലിയ പ്രതിഷേധത്തിന് വഴിവച്ചിരുന്നു. ഇതിന് പിന്നാലെ 2017 മുതൽ ഐതിഹാസിക ജഴ്സി പിൻവലിച്ചിരുന്നു. താക്കൂറിന് പിന്നാലെ 54 എന്ന നമ്പരാണ് നൽകിയത്.രാജ്യാന്തര ക്രിക്കറ്റിൽ നിന്ന് ധോണി വിരമിച്ച് മൂന്ന് വർഷത്തിന് ശേഷമാണ് ബിസിസിഐയുടെ തീരുമാനം.
സച്ചിന് ശേഷം ബഹുമതി ലഭിക്കുന്ന രണ്ടാമത്തെ താരമാണ് ധോണി. നിലവിലുള്ള താരങ്ങളോടും പുതിയ താരങ്ങളോടും ഏഴാം നമ്പർ പിൻവലിക്കുന്ന കാര്യം അറിയിച്ചെന്ന് ബിസിസിഐ ഉദ്യോഗസ്ഥൻ ദേശീയ മാദ്ധ്യമങ്ങളോട് വെളിപ്പെടുത്തി. ജൂലായ് 7 എന്ന ജനനതീയതിയാണ് ധോണി ജഴ്സി നമ്പരായി തിരഞ്ഞെടുത്തിരുന്നത്. തന്റെ ഭാഗ്യ നമ്പരും ഇതുതന്നെയാണെന്നും ധോണി നേരത്തെ വ്യക്തമാക്കിയിട്ടുണ്ട്. നേരത്തെ ശുഭ്മാൻ ഗില്ലും 7 എന്ന നമ്പർ ആവശ്യപ്പെട്ടിരുന്നെങ്കിലും 77 എന്ന നമ്പരാണ് താരത്തിന് നൽകിയത്.