മുംബൈ: സിനിമാ ചിത്രീകരണത്തിന് പിന്നാലെ നടൻ ശ്രേയസ് തൽപാഡെയ്ക്ക് ഹൃദയാഘാതം. ഇന്നലെ രാത്രിയോടെയായിരുന്നു സംഭവം. ബോളിവുഡ്, മറാഠി സിനിമകളിലൂടെ ശ്രദ്ധേയനായ താരം ടു ദി ജംഗിൾ എന്ന പുതിയ സിനിമയുടെ ചിത്രീകരണത്തിന്റെ തിരക്കിലായിരുന്നു. ഇന്നലെ ചിത്രീകരണം അവസാനിപ്പിച്ചതിന് പിന്നാലെയാണ് ഹൃദയാഘാതം ഉണ്ടായത്. തുടർന്ന് അദ്ദേഹത്തെ അന്ധേരിയിലെ സ്വകാര്യ ആശുപത്രിയിൽ പ്രവേശിപ്പിച്ചു. താരത്തിന് ആൻജിയോപ്ലാസ്റ്റി ചെയ്തതായും ഡോക്ടർമാർ അറിയിച്ചു.
കഴിഞ്ഞ ദിവസമാണ് സിനിമയുടെ ചിത്രീകരണത്തിനായി താരം എത്തിയത്. ഇന്നലെ കൂടുതലും ശ്രേയസിന്റെ രംഗങ്ങളാണ് ചിത്രീകരിച്ചത്. ഇതിൽ ആക്ഷൻ രംഗങ്ങളുടെ ചിത്രീകരണവും ഉണ്ടായിരുന്നു. ചിത്രീകരണ സമയത്ത് ശാരീരിക പ്രശ്നങ്ങളൊന്നും ഉണ്ടായിരുന്നില്ലെന്നും പൂർണ ആരോഗ്യവാനായാണ് കണ്ടതെന്നും ചിത്രത്തിന്റെ അണിയറ പ്രവർത്തകർ പറഞ്ഞു.
മറാഠി സീരിയലുകളിലൂടെയാണ് നടൻ സിനിമയിലെത്തിയത്. ശ്രേയസിന്റെ ആദ്യ ചിത്രം ഇഖ്ബാലി (2005)യായിരുന്നു. പിന്നീട് മറാഠിയിലും ഹിന്ദിയിലുമുൾപ്പെടെ നാൽപതിലധികം ചിത്രങ്ങളിൽ അഭിനയിച്ചിട്ടുണ്ട്. ഓം ശാന്തി ഓം, വെൽകം ടു സജ്ജൻപൂർ, ഗോൽമാൽ റിട്ടേൺസ് തുടങ്ങിയവയാണ് ശ്രദ്ധേയ ചിത്രങ്ങൾ.
