തിരുവനന്തപുരം: ഹെൽമെറ്റ് കൊണ്ട് തലയ്ക്കടിച്ച് യുവതിയെ മർദ്ദിച്ച സംഭവത്തിൽ 24-കാരൻ അറസ്റ്റിൽ. നൂറനാട് സ്വദേശി അനന്തുവിനെയാണ് പോലീസ് പിടികൂടിയത്. വിവാഹാഭ്യർത്ഥന നിരസിച്ചെന്ന കാരണത്താലായിരുന്നു യുവതിയെ ഇയാൾ ആക്രമിച്ചത്.
നൂറനാട് സ്വദേശിനിയാണ് യുവതി. നിരവധി തവണ യുവാവ് വിവാഹാഭ്യർത്ഥന നടത്തിയെങ്കിലും ഇവർ താത്പര്യം പ്രകടിപ്പിച്ചിരുന്നില്ല. കഴിഞ്ഞ ദിവസം യുവതിയെ കാണാനിടയായ അനന്തു തന്റെയൊപ്പം വീട്ടിലേക്ക് വരണമെന്ന് നിർബന്ധിച്ചു. എന്നാൽ ഇക്കാര്യവും യുവതി നിരസിച്ചതോടെ അനന്തു ആക്രമിക്കുകയായിരുന്നു. സംഭവത്തിന് പിന്നാലെ പെൺകുട്ടി പോലീസിനെ സമീപിച്ചു. വധശ്രമം ചുമത്തിയാണ് അനന്തുവിനെതിരെ പോലീസ് കേസെടുത്തിരിക്കുന്നത്. പ്രതിയെ മാവേലിക്കര ഫസ്റ്റ് ക്ലാസ് മജിസ്ട്രേറ്റ് കോടതിയിൽ ഹാജരാക്കി. നിലവിൽ റിമാൻഡിലാണ്.
