വിദ്യാഭ്യാസം പൂർത്തിയായി കലാലയത്തിൽ നിന്നും പുറത്തിറങ്ങുന്ന ഏതൊരു വ്യക്തിയും ആദ്യം തയ്യാറാക്കി എടുക്കുന്നത് റെസ്യൂമെയായിരിക്കും. ഏതൊരു ജോലിക്കും റെസ്യൂമെ അടിസ്ഥാനഘടകമാണ്. റെസ്യൂമെയിൽ നിങ്ങൾ ഉൾപ്പെടുത്തിയിട്ടുള്ള പല കാര്യങ്ങളുടെയും അടിസ്ഥാനത്തിലായിരിക്കും അഭിമുഖം ചെയ്യുന്ന വ്യക്തി പലപ്പോഴും നിങ്ങളെ വിലയിരുത്തുക. അതുകൊണ്ടു തന്നെ ഇക്കാര്യങ്ങൾ നിങ്ങളുടെ ബയോഡാറ്റയിൽ ഉൾപ്പെടുത്താൻ പ്രത്യേകം ശ്രദ്ധിക്കണം.
പേരും, നമ്പറും
റെസ്യൂമയിൽ പേരും നമ്പറും കൃത്യമായി എഴുതേണ്ടത് നിർബന്ധമാണ്. നിങ്ങളുടെ മുഴുവൻ പേര്, മൊബൈൽ നമ്പർ, ഇമെയിൽ വിലാസം, നഗരം, സംസ്ഥാനം എന്നിവ പോലുള്ള നിങ്ങളുടെ സ്വകാര്യ വിശദാംശങ്ങൾ ഉൾപ്പെടുത്തേണ്ടത് ഏറ്റവും പ്രധാനമായ കാര്യമാണ്.
പ്രൊഫഷണൽ സമ്മറി
ഈ ഒരു വിഭാഗത്തിൽ നിങ്ങളുടെ അഭിലാഷങ്ങളും കഴിവുകളെയും കുറിച്ചാണ് പ്രത്യേകം പരാമർശിക്കേണ്ടത്. നിങ്ങൾക്ക് കിട്ടിയിരിക്കുന്ന പ്രധാന നേട്ടങ്ങളെ കുറിച്ചും വളരെ ലളിതമായി എഴുതാം.
വിദ്യാഭ്യാസം
ഈ വിഭാഗത്തിൽ നിങ്ങളുടെ വിദ്യാഭ്യാസ യോഗ്യതയാണ് സൂചിപ്പിക്കുന്നത്. ഹൈസ്കൂൾ മുതലുള്ള വിദ്യാഭ്യാസ യോഗ്യതയിൽ നിന്നും തുടങ്ങുന്നതായിരിക്കും ഏറ്റവും ഉചിതം. പഠിച്ച സ്ഥാപനത്തിന്റെ പേര്, കോഴ്സിന്റെ പേര്, മാർക്ക് എന്നിവയും ഇതിൽ ഉൾപ്പെടുത്തണം.
പ്രവൃത്തി പരിചയം:
അടുത്തതായി നിങ്ങൾ ചേർക്കേണ്ടത് പ്രവൃത്തി പരിചയമാണ്. നിങ്ങൾക്ക് ഏതെങ്കിലും സ്ഥാപനത്തിൽ പ്രവർത്തിച്ചതിന്റെ മുൻ പരിചയമുണ്ടെങ്കിൽ അവ കൃത്യമായി എഴുതാം. സ്ഥാപനത്തിന്റെ പേര്, ജോലിയുടെ കാലാവധി, ജോലിയുടെ പേര്, നിങ്ങളുടെ ഉത്തരവാദിത്തങ്ങൾ എന്തൊക്കെയായിരുന്നു എന്നിവ ലളിതമായ രീതിയിൽ കൂട്ടിച്ചേർക്കാം.
കഴിവുകൾ
ഒരു ജോലിക്ക് അപേക്ഷിക്കുമ്പോൾ നിങ്ങൾക്ക് എന്തൊക്കെ കഴിവുകൾ ഉണ്ടെന്ന് കൂട്ടിച്ചേർക്കാൻ പ്രത്യേകം ശ്രദ്ധിക്കണം. നിങ്ങൾ അപേക്ഷിക്കുന്ന തസ്തികയുമായി ബന്ധപ്പെട്ട കഴിവുകൾ നിങ്ങൾക്ക് ഉണ്ടെങ്കിൽ അവയ്ക്ക് പ്രത്യേകം പരിഗണ നൽകി റെസ്യൂമയിൽ ചേർക്കുക.