പഴയ കാലഘട്ടത്തിൽ നിന്നും ഇന്ന് സിനിമയ്ക്ക് വന്ന മാറ്റങ്ങളെ കുറിച്ച് പറഞ്ഞ് നടൻ മോഹൻലാൽ. മുൻപ് സിനിമ വർഷങ്ങളോളം തീയേറ്ററിൽ ഓടിയിട്ടുണ്ടെന്നും എന്നാൽ ഇന്ന് അങ്ങനെയൊന്നുമല്ലെന്നുമാണ് താരം പറയുന്നത്. തന്റെ സിനിമ 365 ദിവസമൊക്കെ ഓടിയിട്ടുണ്ടായിരുന്നു. ഹിന്ദിയിൽ ഒരുവർഷം രണ്ട് വർഷം അഞ്ച് വർഷമൊക്കെ ഓടിയിട്ടുള്ള സിനിമകളുണ്ടായിരുന്നെന്നും ഇന്ന് അതിനുള്ള സാഹചര്യമില്ലെന്നും അദ്ദേഹം പറഞ്ഞു. നേരിന്റെ പ്രമോഷന്റെ ഭാഗമായി ഒരു അഭിമുഖത്തിൽ സംസാരിക്കുകയായിരുന്നു മോഹൻലാൽ.
‘ആളുകൾ നമുക്ക് ചാർത്തി തരുന്നൊരു പട്ടമാണിത്. ഒരുപാട് മികച്ച അഭിനേതാക്കൾ ഉണ്ടാകണമെന്ന് ആഗ്രഹിക്കുന്ന ആളാണ് ഞാൻ. സിനിമകൾ ഭയങ്കരമായി ഓടാൻ തുടങ്ങുമ്പോഴാണ്, സൂപ്പർ ഹിറ്റുകൾ ആകുമ്പോഴാണ് അവരെ സൂപ്പർ സ്റ്റാർ എന്ന് പറയുന്നത്. അന്നത്തെ സിനിമകളും ഇന്നത്തെ സിനിമകളും തമ്മിൽ ഒരുപാട് വ്യത്യാസമുണ്ട്. അന്ന് തിയറ്ററുകളിൽ മാത്രമെ സിനിമകൾ കാണാനുള്ള അവസരമുള്ളൂ.
100, 200 ദിവസമൊക്കെ സിനിമകൾ ഓടിയിരുന്നു. എന്റെ സിനിമ 365 ദിവസമൊക്കെ ഓടിയിട്ടുണ്ട്. ഹിന്ദിയിലൊക്കെ ഒരുവർഷം രണ്ട് വർഷം അഞ്ച് വർഷമൊക്കെ ഓടിയിട്ടുള്ള സിനിമകളുണ്ട്. പക്ഷേ ഇന്നങ്ങനെ അല്ല. ടെലിവിഷൻ വന്നു. ഒടിടി പ്ലാറ്റ്ഫോംസ് വന്നു. വലിയ സൂപ്പർ ഹിറ്റുകൾ ഉണ്ടായാലും ആഘോഷിക്കാൻ എന്ന രീതിയിൽ ഉണ്ടാകാറില്ല. പണ്ട് 100, 125. 200 ദിവസമൊക്കെ വലിയ ആഘോഷമായിട്ടാണ് എടുക്കുന്നത്. അതിനിപ്പോൾ സാഹചര്യങ്ങളില്ല. 100 ദിവസം ഒരു സിനിമ ഓടുക എന്നത് അത്യപൂർവ്വം ആണ്. അത് ഈ സൂപ്പർ സ്റ്റാർ എന്ന പേരിലും റിഫ്ലക്ട് ചെയ്യും. സൂപ്പർ സ്റ്റാർ സക്സസിനെ അനുസരിച്ചിരിക്കും. അങ്ങനെയുള്ള അവസരം കിട്ടുന്നവർ ഉണ്ടായാൽ ഇനിയും ഇത്തരം പേരുകൾ ഉണ്ടാകാം.’- മോഹൻലാൽ പറഞ്ഞു.
