കോട്ടയം: തിരുവൈരാണിക്കുളം മഹാദേവ ക്ഷേത്രത്തിലെ ശ്രീപാർവതിദേവിയുടെ നടതുറപ്പ് മഹോൽസവ ദിനങ്ങളിൽ ദർശനത്തിനായുള്ള വെർച്വൽ ക്യൂ ബുക്കിംഗിന്റെ ഉദ്ഘാടനം നിർവഹിച്ച് ഗായിക കെ.എസ്. ചിത്ര. ക്ഷേത്രത്തിന്റെ വെബ്സൈറ്റായ www.thiruvairanikkulamtemple.org വഴി ഭക്തജനങ്ങൾക്ക് വെർച്വൽ ക്യൂ ബുക്ക് ചെയ്യാവുന്നതാണ്.
ഇതിലൂടെ ഭക്തർക്ക് സമയബന്ധിതമായി ദർശനം പൂർത്തിയാക്കുന്നതിന് സാധിക്കുമെന്ന് ഭാരവാഹികൾ അറിയിച്ചു. ഈ മാസം 26 മുതൽ 2024 ജനുവരി 6 വരെയാണ് നടതുറപ്പ് മഹോത്സവം.
വെർച്വൽ ക്യൂ ബുക്ക് ചെയ്യുന്ന ഭക്തർക്ക് ദേവസ്വം പാർക്കിംഗ് ഗ്രൗണ്ടുകളായ സൗപർണ്ണിക ,കൈലാസം എന്നിവിടങ്ങളിലെ വെരിഫിക്കേഷൻ കൗണ്ടറിൽ ബുക്കിംഗ് രസീത് നൽകി ദർശന പാസ്സ് വാങ്ങാവുന്നതാണ്. സാധാരണ ക്യൂവിലൂടെയും ദർശനത്തിന് അവസരമുണ്ട്.
ധനുമാസത്തിലെ തിരുവാതിര മുതൽ 12 ദിവസം മാത്രം ദർശനം നൽകുന്ന ക്ഷേത്രമാണ് തിരുവൈരാണിക്കുളം മഹാദേവ ക്ഷേത്രം. ഭക്തജനങ്ങളില് നല്ലൊരുഭാഗവും സ്ത്രീകളാണ്. ക്ഷേത്രത്തിന് സ്ത്രീകളുടെ ശബരിമല എന്നൊരു അപരനാമവുമുണ്ട്.
