ന്യൂഡൽഹി: ഇന്റലിജൻസ് ബ്യൂറോയിൽ വിവിധ തസ്തികകളിലേക്കുള്ള അപേക്ഷകൾ ക്ഷണിച്ചു. 226 ഒഴിവുകളിലേക്കുള്ള നിയമനത്തിനാണ് അപേക്ഷ ക്ഷണിച്ചിരിക്കുന്നത്. അസിസ്റ്റന്റ് സെൻട്രൽ ഇന്റലിജൻസ് ഓഫീസർ (എ സി ഐ ഒ) ഗ്രേഡ്-II-ടെക് തസ്തികകളിലേക്കുള്ള ഒഴിവുകൾ സംബന്ധിച്ച വിജ്ഞാപനമാണ് ഇന്റലിജൻസ് ബ്യൂറോ പുറത്തിറക്കിയത്.
കമ്പ്യൂട്ടർ സയൻസ് ആൻഡ് ഇൻഫർമേഷൻ ടെക്നോളജി, ഇലക്ട്രോണിക്സ് ആൻഡ് കമ്മ്യൂണിക്കേഷൻ വിഭാഗങ്ങളിൽ വൈദഗ്ധ്യമുള്ള ഉദ്യോഗാർത്ഥികൾക്കാണ് മുൻഗണന. ഡിസംബർ 23 മുതൽ അപേക്ഷ സമർപ്പിക്കാം. ജനുവരി 12-ന് മുമ്പ് അപേക്ഷ സമർപ്പിക്കണം.
ഐബി എസിഐഒ ഗ്രേഡ്-II-ടെക് തസ്തികയിലേക്ക് 226 ഒഴിവുകളാണ് പ്രഖ്യാപിച്ചിരിക്കുന്നത്. ഇവയിൽ 79 ഒഴിവുകൾ കമ്പ്യൂട്ടർ സയൻസ് ആൻഡ് ഇൻഫർമേഷൻ ടെക്നോളജി സ്ട്രീമിലേക്കാണ് അപേക്ഷ ക്ഷണിച്ചിരിക്കുന്നത്. 147 ഒഴിവുകൾ ഇലക്ട്രോണിക്സ് ആന്റ് കമ്മ്യൂണിക്കേഷൻ സ്ട്രീമിലേക്കാണ് അപേക്ഷ ക്ഷണിച്ചിരിക്കുന്നത്. ആദ്യ കാറ്റഗറിയിൽ എസ്സി, എസ്ടി വിഭാഗങ്ങളിൽ 11, 3 എന്നിങ്ങനെയാണ് യഥാക്രമം ഒഴിവുകൾ. രണ്ടാം കാറ്റഗറിയിൽ 18, 6 ഒഴിവുകളും സംവരണം ചെയ്തിട്ടുണ്ട്.
18-നും 27-നും ഇടയിൽ പ്രായമുള്ള ഉദ്യോഗാർത്ഥികൾക്കാണ് യോഗ്യത. 44,900 മുതൽ 1,42,400 രൂപ വരെയാണ് ശമ്പളം. അപേക്ഷ സമർപ്പിക്കുന്നതിനൊപ്പം ഫീസ് നൽകേണ്ടതുണ്ട്. കൂടുതൽ വിവരങ്ങൾക്ക് mha.gov.in എന്ന ഔദ്യോഗിക വെബ്സൈറ്റ് സന്ദർശിക്കുക.
