ഇന്ന് പലരെയും അലട്ടുന്ന മുഖ്യപ്രശ്നങ്ങളിലൊന്നാണ് വിട്ടുമാറാത്ത വായ്പ്പുണ്ണ്. മാറിവരുന്ന ജീവിത ശൈലികളും ഉറക്കക്കുറവും മാനസിക സമ്മർദ്ദവും ഇതിന്റെ കാരണങ്ങളായി വരാം. അബദ്ധത്തിൽ വായയുടെ ഉൾഭാഗം കടിക്കുക, വിറ്റാമിൻ കുറവുകൾ, പ്രതിരോധശേഷി കുറവ് തുടങ്ങിയവയും വായ്പ്പുണ്ണ് വരുന്നതിന്റെ മറ്റു കാരണങ്ങളാണ്. ചെറിയ തോതിലുള്ള വായ്പ്പുണ്ണുകൾ വീട്ടിലുള്ള കാര്യങ്ങൾ വച്ചുകൊണ്ടു തന്നെ മാറ്റിയെടുക്കാവുന്നതാണ്.
വയ്പ്പുണ്ണ് അകറ്റുന്നതിനായി പഴമക്കാർ എപ്പോഴും ചെയ്യുന്ന ഒരു നാട്ടുവൈദ്യമാണ് പനിക്കൂർക്കയുടെ നീരെടുത്ത് തേനിനൊപ്പം വെറും വയറ്റിൽ കുടിക്കുന്നത്. പുളിയുള്ള മോര് ദിവസവും ഒരു ഗ്ലാസ് കുടിക്കുന്നതും തേങ്ങാപാലെടുത്ത് ഒന്നോ രണ്ടോ തവണ കവിൾ കൊള്ളുന്നതും വായ്പ്പുണ്ണ് അകറ്റാൻ സഹായിക്കുന്നതാണ്. ഇതിനുപുറമെ ചെറു ചൂടുവെള്ളത്തിൽ ഉപ്പിട്ട് കവിൾ കൊള്ളുന്നതും ചെറിയ വായ്പ്പുണ്ണുകൾ പെട്ടന്ന് മാറാൻ സഹായിക്കുന്നതാണ്. എന്നാൽ വിട്ടുമാറാത്ത വായ്പ്പുണ്ണ് നിങ്ങൾക്കുണ്ടെങ്കിൽ അത് ഓറൽ ക്യാൻസറിന്റെ ലക്ഷണങ്ങളായിരിക്കാം. അറിയാം..
പല്ലുകളിൽ നിന്നും രക്തസ്രാവം വരുന്നതും തൊണ്ടയിൽ മുഴകൾ രൂപപ്പെടുന്നതും ഓറൽ ക്യാൻസറിന്റെ ലക്ഷണങ്ങളാണ്. ഇതിനുപുറമെ, കീഴ്ച്ചുണ്ടിൽ ഉണങ്ങാതിരിക്കുന്ന വായ്പ്പുണ്ണ്, ചുണ്ടിലോ കഴുത്തിലോ താടിയിലോ ഉണ്ടാകുന്ന മരവിപ്പ്, ഭക്ഷണം കഴിച്ചിറക്കുമ്പോൾ വേദന, ഭാരക്കുറവ്, ചെവിവേദന, ചുണ്ടുകളിൽ വെള്ള അല്ലെങ്കിൽ ചുവന്നതോ ഇരുണ്ട നിറത്തിലോ ഉള്ള പാടുകൾ എന്നിവയും ഓറൽ ക്യാൻസറിന്റെ ലക്ഷണങ്ങളായിരിക്കാം. വർഷങ്ങളോളം വായ്പ്പുണ്ണിന്റെ പ്രശ്നങ്ങൾ അലട്ടുന്നതിനോടൊപ്പം ഇത്തരം ലക്ഷണങ്ങൾ നിങ്ങളിൽ കാണപ്പെടുന്നുണ്ടെങ്കിൽ ഉടൻ തന്നെ വൈദ്യസഹായം തേടുക.
