കണ്ണൂർ: കോൺഗ്രസ് നേതാവും കണ്ണൂരിലെ ഡിസിസി സെക്രട്ടറിയുമായിരുന്ന സി രഘുനാഥ് ബിജെപിയിൽ ചേരും. ബിജെപി ദേശീയ അദ്ധ്യക്ഷൻ ജെപി നദ്ദയിൽ നിന്ന് ഡൽഹിയിലെ പാർട്ടി ആസ്ഥാനത്ത് വച്ച് വൈകിട്ട് അംഗത്വം സ്വീകരിക്കും. നിയമസഭാ തിരഞ്ഞെടുപ്പിൽ ധർമ്മടത്ത് പിണറായി വിജയനെതിരെ കോൺഗ്രസ് സ്ഥാനാർത്ഥിയായി മത്സരിച്ച വ്യക്തിയാണ് സി രഘുനാഥ്. നേതൃത്വവുമായുള്ള അഭിപ്രായ ഭിന്നതകളെ തുടർന്ന് കഴിഞ്ഞ ദിവസമാണ് രഘുനാഥ് കോൺഗ്രസ് വിട്ടത്.
ഏറെ കാലമായി താൻ പാർട്ടിക്കുള്ളിൽ അവഗണന നേരിട്ടുകൊണ്ടിരിക്കുകയാണെന്ന് അദ്ദേഹം പറഞ്ഞു. പല കാര്യങ്ങളും പാർട്ടിക്കകത്ത് പറയുമ്പോൾ തന്നെ ഒറ്റപ്പെടുത്തുന്ന
സാഹചര്യമാണ് നേതൃത്വത്തിന്റെ ഭാഗത്തുനിന്നുണ്ടായത്. പല പരിപാടികളിൽ നിന്നും തഴഞ്ഞു. നേതൃത്വത്തിന്റെ അവഗണനയിൽ മനംനൊന്താണ് രാജി വയ്‌ക്കുന്നതെന്നായിരുന്നു സി രഘുനാഥിന്റെ പ്രതികരണം. കെപിസിസി അദ്ധ്യക്ഷനായിട്ടും കെ. സുധാകരനെക്കൊണ്ട് ഗുണമുണ്ടായില്ലെന്നും രഘുനാഥ് തുറന്നടിച്ചിരുന്നു.
