ന്യൂഡൽഹി: സംവിധായകൻ മേജർ രവിയും കണ്ണൂരിലെ പ്രമുഖ കോൺഗ്രസ്സ് നേതാവായ സി. രഘുനാഥും ബിജെപി അംഗത്വം സ്വീകരിച്ചു. ഡൽഹിയിൽ പാർട്ടി ആസ്ഥാനത്ത് ദേശീയ അദ്ധ്യക്ഷൻ ജെപി നദ്ദയിൽ നിന്നാണ് ഇരുവരും പാർട്ടി അംഗത്വം സ്വീകരിച്ചത്. ജെ പി നദ്ദയുമായുള്ള കൂടിക്കാഴ്ചയ്ക്ക് ശേഷമാണ് ഇരുവരും അംഗത്വം സ്വീകരിച്ചത്. അംഗത്വം സ്വീകരിക്കുന്ന വേളയിൽ ബിജെപി സംസ്ഥാന അദ്ധ്യക്ഷൻ കെ സുരേന്ദ്രനും ഇരുവർക്കുമൊപ്പമുണ്ടായിരുന്നു.
നിരവധി പ്രമുഖ വ്യക്തിത്വങ്ങൾ വരും ദിവസങ്ങളിൽ പാർട്ടിയിൽ ചേരാൻ സന്നദ്ധരാവുമെന്ന് ബിജെപി സംസ്ഥാന അദ്ധ്യക്ഷൻ കെ സുരേന്ദ്രൻ വ്യക്തമാക്കി. കീർത്തി ചക്ര, കുരുക്ഷേത്ര, കർമ്മയോദ്ധ ഉൾപ്പെടെയുള്ള സിനിമകൾ സംവിധാനം ചെയ്ത വ്യക്തിയാണ് മേജർ രവി. സി. രഘുനാഥ് കോണഗ്രസിന്റെ ഉന്നതനേതാക്കളിലൊരാളാണ്. കഴിഞ്ഞ നിയമസഭ തിരഞ്ഞെടുപ്പിൽ ധർമ്മടത്ത് പിണറായി വിജയനെതിരെ യുഡിഎഫ് സ്ഥാനാർത്ഥിയായി മത്സരിച്ച വ്യക്തിയാണ് സി രഘുനാഥ്. കെപിസിസി അദ്ധ്യക്ഷൻ കെ സുധാകരന്റെ വിശ്വസ്തനും കൂടിയായിരുന്നു ഇദ്ദേഹം.