കർഷകർ നഷ്ടപരിഹാരത്തിനായി ആത്മഹത്യ ചെയ്യുന്നു; വായ്‌പ എഴുതിത്തള്ളുന്നതിനാൽ വരൾച്ചയാഗ്രഹിക്കുന്നു; മനുഷ്യവിരുദ്ധ പ്രസ്താവനയുമായി കർണ്ണാടക കൃഷിമന്ത്രി

ബെംഗളൂരു: കർഷകർക്കെതിരെ അവഹേളന പരാമർശവുമായി വീണ്ടും കർണ്ണാടക കൃഷി വകുപ്പ് മന്ത്രി ശിവാനന്ദ് പാട്ടീൽ.

കർഷകർക്ക് വായ്പ എഴുതിത്തള്ളലിൽ നിന്ന് പ്രയോജനം ലഭിക്കുന്നതിനാൽ അവർ ഇടയ്‌ക്കിടെ വരൾച്ചയാണ് ഇഷ്ടപ്പെടുന്നതെന്നാണ് മന്ത്രിയുടെ അഭിപ്രായം.

“കൃഷ്ണ നദീജലം സൗജന്യം; വൈദ്യുതി സൗജന്യമാണ്. വിത്തും വളവും മുഖ്യമന്ത്രി സൗജന്യമായി നൽകും. വായ്പകൾ എഴുതിത്തള്ളിയതിനാൽ, സംസ്ഥാനം ആവർത്തിച്ചുള്ള വരൾച്ച അനുഭവിക്കണമെന്ന് മാത്രമാണ് കർഷകർ ആഗ്രഹിക്കുന്നത്. അവർക്കത് ഇഷ്ടമല്ലെങ്കിൽ പോലും, നാല് വർഷത്തിലൊരിക്കൽ വരൾച്ച സംഭവിക്കുന്നു.” ഇതാണ് കൃഷി മന്ത്രി പറഞ്ഞത്

മുൻകാലത്തും ധാരാളം വിവാദ പരാമർശങ്ങൾ ഇദ്ദേഹം നടത്തിയിട്ടുണ്ട്.’നഷ്ടപരിഹാരത്തുക 2 ലക്ഷം രൂപയിൽ നിന്ന് 5 ലക്ഷം രൂപയായി വർദ്ധിപ്പിച്ചതിന് ശേഷം കർഷക ആത്മഹത്യകൾ വർധിച്ചിരിക്കുന്നു’ എന്നാണ് കഴിഞ്ഞ സെപ്റ്റംബറിൽ മന്ത്രി ശിവാനന്ദ് പാട്ടീൽ പറഞ്ഞത്.

ശിവാനന്ദ് പാട്ടീലിന്റെ വാക്കുകൾ കർഷകരെയും അവരുടെ സാംസ്കാരിക മൂല്യങ്ങളെയും അവഹേളിക്കുന്നതാണെന്ന് ബിജെപി സംസ്ഥാന പ്രസിഡന്റ് ബി വൈ വിജയേന്ദ്രയും മുൻ ദേശീയ ജനറൽ സെക്രട്ടറി സി ടി രവിയും പ്രസ്താവിച്ചു.

കർണാടക അതിന്റെ ഏറ്റവും മോശമായ വരൾച്ചയെ അഭിമുഖീകരിക്കുന്ന ഈ സമയത്ത് കൃഷി മന്ത്രി ഇങ്ങിനെ പറഞ്ഞത് കാർഷിക സമൂഹത്തിന്റെ ക്ഷേമത്തെക്കുറിച്ച് ആശങ്ക ഉയർത്തുന്നു എന്ന് സംസ്ഥാന ബിജെപി ഘടകം അഭിപ്രായപ്പെട്ടു.

കർഷകരുടെ അവകാശങ്ങളോടുള്ള പ്രതിബദ്ധത ഉയർത്തിക്കാട്ടാനും കാർഷിക പ്രശ്നങ്ങൾ കൈകാര്യം ചെയ്യുന്നതിൽ കോൺഗ്രസ് സർക്കാരിനെ ഉത്തരവാദിയാക്കാനും ബിജെപി ഈ സംഭവം ഉപയോഗിക്കുന്നു.

കർഷകരെ അവഹേളിച്ച പാട്ടീലിന്റെ രാജി ഉടൻ ആവശ്യപ്പെടണമെന്നു കർണ്ണാടക മുഖ്യമന്ത്രി സിദ്ധരാമയ്യയോട് ബിജെപി ആവശ്യപ്പെട്ടു.