ബോക്സിംഗ് ഡേ ടെസ്റ്റിൽ നാണക്കേടിന്റെ റെക്കോർഡ് കൈയെത്തിപ്പിടിച്ച് നായകൻ രോഹിത് ശർമ്മ. പ്രോട്ടീസ് പേസർ കഗീസോ റബാദയ്‌ക്ക് വിക്കറ്റ് നൽകിയതിന് പിന്നാലെയാണ് രോഹിത് നാണക്കേടിന്റെ ചരിത്രം സ്വന്തം പേരിലാക്കിയത്. രോഹിത് ശർമയെ ഏറ്റവും കൂടുതൽ തവണ പുറത്താക്കിയ താരമായി ദക്ഷിണാഫ്രിക്കൻ താരം. രാജ്യാന്തര ക്രിക്കറ്റിൽ 13 തവണയാണ് രോഹിത്ത് റബാദയുടെ ഇരയായത്.
ഇന്ന് റബാദയുടെ ബൗൺസർ ഹുക്ക് ചെയ്യാനുള്ള ശ്രമം നന്ദ്രെ ബർഗറുടെ കൈകളിൽ അവസാനിക്കുകയായിരുന്നു. അഞ്ചു റൺസായിരുന്നു സമ്പാദ്യം. ന്യൂസിലൻഡ് താരം ടിം സൗത്തി രോഹിത്തിനെ 12 തവണ പുറത്താക്കി പട്ടികയിൽ രണ്ടാം സ്ഥാനത്തുണ്ട്. തൊട്ടു പിന്നാലെ എയ്ഞ്ചോലോ മാത്യൂസ് (10), നതാൻ ലിയോൺ (9), ട്രെന്റ് ബോൾട്ട് (8) എന്നിവരുമുണ്ട്. ടെസ്റ്റിൽ ആറ് തവണയാണ് റബാദ രോഹിത്തിനെ മടക്കിത്. ടെസ്റ്റിൽ രോഹിത്തിനെ ഏറ്റവും കൂടുതൽ തവണ പുറത്താക്കിയ പേസറും റബാദ തന്നെ.
