ശ്യാമപ്രസാദ് സംവിധാനം ചെയ്ത ഋതു എന്ന ചിത്രത്തിലൂടെ മലയാള സിനിമാ രംഗത്തേയ്‌ക്ക് കടന്നു വന്ന നടനാണ് നിഷാൻ. പിന്നീട് മലയാള സിനിമയിൽ നടനായും സഹനടനായും തിളങ്ങി. തെന്നിന്ത്യൻ ചിത്രങ്ങളിൽ ഒരു ചെറിയ ഇടവേളയെടുത്ത താരം നിലവിൽ മറ്റ് ഭാഷ ചിത്രങ്ങളിലും ബോളിവുഡിലും സജീവമാണ്. 11 വർഷത്തിന് ശേഷം നിഷാൻ മലയാളത്തിൽ വീണ്ടും സജീവമാകുന്നു എന്ന വാർത്തയും അടുത്തിടെ പുറത്തുവന്നിരുന്നു.
ഇപ്പോഴിതാ താരം സമൂഹമാദ്ധ്യമങ്ങളിൽ പങ്കുവച്ച ഒരു വീഡിയോ ശ്രദ്ധേയമാവുകയാണ്. തന്റെ ഫാം ഹൗസിലെ ജോലിക്കാർക്കൊപ്പം ജോലി ചെയ്യുന്നതിതിന്റെ വീഡിയോയാണ് താരം പങ്കുവച്ചിരിക്കുന്നത്. കാപ്പിക്കുരു വിളവെടുത്ത് വിൽപ്പനയ്‌ക്കായി തയ്യാറാക്കുകയാണ്. രണ്ട് തൊഴിലാളികൾ കാപ്പിക്കുരു ചാക്കുകളിൽ നിറക്കുകയും നിഷാൻ അവർക്കൊപ്പം ചേർന്ന് ചാക്കുകെട്ടുകളുടെ തൂക്കമെടുക്കുകയും വാഹനത്തിൽ കയറ്റാനും സഹായിക്കുന്നത് കാണാം.
തൊഴിലാളികളിൽ ഒരുവനായി താരം ജോലി ചെയ്യുന്ന വീഡിയോ ആരാധകർ ഇതിനോടകം ഏറ്റെടുത്ത് കഴിഞ്ഞു. ‘കാപ്പി ഉണക്കലും തൂക്കവും വിൽപ്പനയും ഇപ്പോൾ മുഴുവൻ സമയവും കർഷകനാണ്. യഥാർത്ഥ ജീവിതത്തിൽ ഫുൾടൈം നായകനും പാർട്ട് ടൈം കർഷകനുമാണ്’ എന്നായിരുന്നു വീഡിയോ പങ്കുവച്ച് നിഷാൻ കുറിച്ചത്. കർണാടകയിലെ കുടക് സ്വദേശിയാണ് നിഷാൻ.
View this post on Instagram
ആസിഫ് അലിക്കൊപ്പം കിഷ്‌കിന്ധാകാണ്ഡത്തിലാണ് നിഷാൻ ഇപ്പോൾ അഭിനയിച്ചുകൊണ്ടിരിക്കുന്നത്. അപർണ ബാലമുരളിയാണ് ചിത്രത്തിൽ നായികയായി എത്തുന്നത്. ദിൻജിത്ത് അയ്യത്താൻ സംവിധാനം ചെയ്യുന്ന ചിത്രത്തിന്റെ ഷൂട്ടിംഗ് പാലക്കാടും പരിസരപ്രദേശങ്ങളിലും പുരോഗമിക്കുകയാണ്.
