ന്യൂഡൽഹി: രാജ്യത്തെ 71 ലക്ഷത്തിൽ അധികം വാട്സ്ആപ്പ് അക്കൗണ്ടുകളുടെ സേവനം മരവിപ്പിച്ച് മെറ്റ. കഴിഞ്ഞ നവംബർ ഒന്ന് മുതൽ 30 വരെയുള്ള കണക്കുകളാണ് മെറ്റ പുറത്തുവിട്ടിരിക്കുന്നത്. 71,96000 വാട്സ്ആപ്പ് അക്കൗണ്ടുകൾ മെറ്റ മരവിപ്പിച്ചുവെന്നാണ് ഔദ്യോഗിക കണക്കുകൾ. ഒരു മാസത്തിൽ ഇത്രയധികം അക്കൗണ്ടുകൾക്ക് വിലക്കേർപ്പെടുത്തുന്നത് ഇതാദ്യമാണ്
വാട്സ്ആപ്പ് ഉപയോക്താക്കളിൽ നിന്ന് ലഭിച്ച പരാതികളുടെ അടിസ്ഥാനത്തിൽ നടപടി സ്വീകരിച്ചവയാണ് അധികവും. ഉപയോക്താക്കളിൽ നിന്നും ലഭിക്കുന്ന പരാതിയ്ക്ക് പുറമെ 19,54,000 അക്കൗണ്ടുകളുടെ സേവനം നിർത്തലാക്കിയതായും മെറ്റ വ്യക്തമാക്കി. സാമ്പത്തിക തട്ടിപ്പ്, അശ്ലീല അക്കൗണ്ടുകൾ, വ്യാജ വാർത്തകൾ, വിദ്വേഷ പ്രചരണം എന്നിവയ്ക്ക് വേണ്ടി ഉപയോഗിച്ച അക്കൗണ്ടുകളാണ് നിരോധിച്ചിരിക്കുന്നത്.
പുതിയ ഐടി നിയമങ്ങൾക്കനുസരിച്ചാണ് നടപടി സ്വീകരിച്ചിരിക്കുന്നതെന്ന് കമ്പനി പുറത്തുവിട്ട റിപ്പോർട്ടിൽ പറയുന്നു. വാട്സ്ആപ്പിന്റെ പ്രതിമാസ കംപ്ലയിൻസ് റിപ്പോർട്ടിലാണ് കണക്കുകൾ സൂചിപ്പിച്ചിരിക്കുന്നത്.
