മുംബൈ: അയോദ്ധ്യയിലെ പ്രാണപ്രതിഷ്ഠാ ദിനത്തിൽ ജനങ്ങൾ ദീപാവലി പോലെ ആഘോഷിക്കാനും വീടുകളിൽ ദീപം തെളിക്കാനും അഭ്യർത്ഥിച്ച് മഹാരാഷ്‌ട്ര മുഖ്യമന്ത്രി ഏകനാഥ് ഷിൻഡെ. മുംബൈയിൽ നടന്ന ഒരു ശുചീകരണ യജ്ഞത്തിൽ സംസാരിക്കവെയാണ് മുഖ്യമന്ത്രിയുടെ ആഹ്വാനം.
ജനുവരി 22 ന് രാമക്ഷേത്രം തുറക്കുന്ന അവസരത്തിൽ മുംബൈ നഗരത്തിലുടനീളം ദീപാവലി ആഘോഷിക്കണമെന്ന് ബിഎംസിയോട് (മുംബൈ മുനിസിപ്പൽ കോർപ്പറേഷൻ) ആവശ്യപ്പെട്ടിട്ടുണ്ട്. ആ ദിവസം സന്തോഷത്തിന്റെയും പ്രത്യാശയുടേതുമാണ്. അത് ആഘോഷിക്കുക തന്നെ വേണമെന്നും മുംബൈയിലെ എല്ലാ ക്ഷേത്രങ്ങളിലും അന്നേദിവസം പ്രത്യേക പൂജകൾ നടത്തണമെന്നും അദ്ദേഹം കൂട്ടിച്ചേർത്തു.
ശിവസേന സ്ഥാപകൻ അന്തരിച്ച ബാലാസാഹേബ് താക്കറെയുടെയും നിരവധി രാമഭക്തരുടെയും സ്വപ്നമായിരുന്നു രാമക്ഷേത്രം. പ്രധാനമന്ത്രി നരേന്ദ്ര മോദി ആ സ്വപ്നം സാക്ഷാത്കരിച്ചു. എന്താണോ പറയുന്നത് അത് യാഥാർത്ഥ്യമാക്കുമെന്ന് അദ്ദേഹം ഉറപ്പുനൽകുന്നു. റെയിൽവേയോ വിമാനത്താവളമോ എന്തുമാക‌ട്ടെ, വാഗ്ദാനങ്ങളെല്ലാം അദ്ദേഹം നടപ്പിലാക്കുന്നു. അതിനാൽ തന്നെ പ്രധാനമന്ത്രി നൽകുന്ന വാഗ്ദാനങ്ങളെ എല്ലാവരും അംഗീകരിക്കുന്നുവെന്നും എക്നാഥ് ഷിൻഡെ പറഞ്ഞു.
