തെലുങ്ക് യുവതാരം നാഗ ചൈതന്യയും തെന്നിന്ത്യൻ താരസുന്ദരി സായ് പല്ലവിയും ഒരുമിക്കുന്ന ഏറ്റവും പുതിയ ചിത്രമാണ് തണ്ടേൽ. നാഗ ചൈതന്യ മത്സ്യത്തൊഴിലാളിയുടെ വേഷത്തിലെത്തുന്ന ചിത്രം ചന്തു മൊണ്ടതിയാണ് സംവിധാനം ചെയ്യുന്നത്. പ്രേമം, സവ്യസാചി എന്നീ ചിത്രങ്ങൾക്ക് ശേഷം ഹിറ്റ് കൂട്ടുകെട്ട് വീണ്ടും ഒരുമിക്കുന്നു എന്ന പ്രത്യേകതയും ചിത്രത്തിനുണ്ട്. ഇരുവരുടെയും കരിയറിലെ ആദ്യത്തെ ബിഗ് ബജറ്റ് ചിത്രം കൂടിയാണ് തണ്ടേൽ.
ഇപ്പോഴിതാ ചിത്രത്തിന്റെ ടീസർ പുറത്തുവിട്ടിരിക്കുകയാണ് അണിയറ പ്രവർത്തകർ. പാകിസ്താൻ ജയിലിലാകുന്ന മത്സ്യത്തൊഴിലാളികളുടെ കഥയാണ് ചിത്രത്തിൽ പറയുന്നത്. നാഗ ചൈതന്യ ഇതുവരെ ചെയ്ത കഥാപാത്രങ്ങളെ അപേക്ഷിച്ച് ഏറെ വെല്ലുവിളികൾ നിറഞ്ഞ കഥാപാത്രം കൂടിയാണ് തണ്ടേലിലേത്. 2018 ൽ നടന്ന ഒരു യാഥാർത്ഥ സംഭവത്തെ ആസ്പദമാക്കിയാണ് ചിത്രം ഒരുങ്ങുന്നത്.
തണ്ടേൽ ഏപ്രിലിൽ തീയേറ്ററുകളിലെത്തും. ജിഎ 2 പിക്ചേഴ്സിന്റെ ബാനറിൽ അല്ലു അരവിന്ദാണ് ചിത്രം നിർമ്മിക്കുന്നത്. സംഗീത സംവിധാനം നിർവ്വഹിക്കുന്നത് ദേവിശ്രീ പ്രസാദാണ്. ചന്തു മൊണ്ടതി തന്നെയാണ് കഥയും തിരക്കഥയും ഒരുക്കുന്നത്.