വംശനാശ ഭീഷണി നേരിടുന്ന കഴുകനാണ് ഇന്ത്യൻ കഴുകൻ. ചുവന്ന തലയാണ് ഇവയുടെ വലിയ പ്രത്യേകത. Sarcogyps calvus എന്ന ശാസ്ത്രീയ നാമത്തിൽ അറിയപ്പെടുന്ന ഇവ ഏഷ്യൻ കിംഗ് വൾച്ചർ എന്നും ഇന്ത്യൻ ബ്ലാക്ക് വൾച്ചറെന്നും അറിയപ്പെടുന്നു. ഇന്ത്യൻ ഉപഭൂഖണ്ഡത്തിലാണ് ഇവയെ പ്രധാനമായും കാണാൻ കഴിയുക. തെക്കുകിഴക്കൻ ഏഷ്യയിലെ ചെറു ജനവാസ മേഖലകളിലും ഇവയെ കാണാൻ കഴിയും. പാകിസ്താൻ, ചൈന, ടിബറ്റ്, ലാവോസ്, വിയറ്റ്നാം എന്നിവയുൾപ്പെടെ ദക്ഷിണേഷ്യയുടെ മറ്റ് ഭാഗങ്ങളിലും കാണപ്പെടുന്നു.
സമുദ്രനിരപ്പിൽ നിന്ന് 2,500-3,000 മീറ്റർ ഉയരത്തിലാണ് ഇന്ത്യൻ കഴുകനെ സാധാരണയായി കാണാൻ സാധിക്കുക. ആൺ കഴുകന്മാർക്ക് വെള്ള അല്ലെങ്കിൽ വിളറിയ കണ്ണുകളും പെൺ കഴുകന്മാർക്ക് കറുത്ത ഇരുണ്ട കണ്ണുകളുമാണ് ഉള്ളത്. ഇവയുടെ ചുവന്ന കഴുത്താണ് ഇന്ത്യൻ കഴുകനെ ചുവന്ന കഴുകനെന്ന് പേര് വരാൻ കാരണം. കഴുത്തിന് പുറമേ കാലുകൾ, തൂവലുകളും ചുവപ്പ് നിറത്തിലാണ്. ഇവയുടെ ഈ ചുവപ്പൻ കാന്തി വേറിട്ടുനിൽക്കുന്നു.
കഴുകന്മാർ കൂട്ടമായാണ് ഭക്ഷണം കഴിക്കാൻ ഒത്തു ചേരുന്നത്. ഒരു കഴുകനെ പിന്തുടർന്ന് മറ്റുള്ള എത്താറാണ് പതിവ്. എന്നാൽ ചുവന്ന തലയുള്ള കഴുകൻ ഇതിൽ നിന്നും വ്യത്യസ്തനാണ്. ഒന്നോ രണ്ടോ പേർ മാത്രമായാണ് ഇവ ശവശരീരം കഴിക്കുക. മറ്റ് കഴുകന്മാരെ പോലെ ചുവന്ന തലയുള്ള കഴുകൻ ധാരാളം ശബ്ദങ്ങൾ ഉണ്ടാക്കുന്നില്ല. പകരം അത് ചുറ്റുപാടുകളെ നിരീക്ഷിക്കുന്നതിനും മറ്റുള്ളവരെ അറിയിക്കാതെ ഭക്ഷണം തേടുന്നതിനും ഇരിക്കാനും പറക്കാനുമൊക്കെയാണ് ഇവ ഇഷ്ടപ്പെടുന്നത്.
എന്നാൽ ഈ നൂറ്റാണ്ടിന്റെ ആദ്യം മുതൽ ഇവ വംശനാശ ഭീഷണി നേരിടുകയാണ്. കന്നുകാലികളെയും മറ്റ് മൃഗങ്ങളുടെയും ചികിത്സയ്ക്ക് ഉപയോഗിക്കുന്ന ഫാർമസ്യൂട്ടിക്കൽ NSAID ഡിക്ലോഫെനാക് എന്ന മരുന്നിന്റെ ഉപയോഗമാണ് കഴുകന്റെ എണ്ണം കുറയാനുള്ള പ്രധാന കാരണമായി പറയുന്നത്. ഇത്തരം മരുന്നുകൾ കഴിക്കുന്ന മൃഗങ്ങളുടെ അവശിഷ്ടങ്ങൾ കഴിക്കുന്ന കഴുകന്മാർക്ക് വൃക്ക രോഗം, സന്ധിവാതം തുടങ്ങിയ ആരോഗ്യ പ്രശ്നങ്ങൾ ഉണ്ടാവുകയും ഇവ മരണത്തിന് കീഴടങ്ങുകയും ചെയ്യന്നു.
