നഗരത്തിലെ വർദ്ധിച്ചുവരുന്ന ജനസംഖ്യയും ഗതാഗതക്കുരുക്കും കോൺക്രീറ്റ് കെട്ടിടങ്ങളും മനസിന്റെ സ്വസ്ഥത നഷ്ടപ്പെടാൻ കാരണമാകാറുണ്ട്. നഗരജീവിതത്തിന്റെ തിരക്കിൽ നിന്ന് മാറി, സ്വസ്ഥവും സുന്ദരവുമായ ഇടം എല്ലാവരുടെയും സ്വപ്നമാണ്. ആ സ്വപ്നം യാഥാർത്ഥ്യമാക്കാൻ നിങ്ങളെ സഹായിക്കുന്ന നിരവധി ഗ്രാമങ്ങൾ ഭാരതത്തിലുണ്ട്. പ്രകൃതി സൗന്ദര്യത്തിനും ശുചിത്വത്തിനും പേരുകേട്ട ചില ഗ്രാമങ്ങൾ പരിചയപ്പെടാം
മൗലിനോംഗ്
ഏഷ്യയിലെ ഏറ്റവും വൃത്തിയുള്ള ഗ്രാമം എന്നാണ് മേഘാലയിലെ
മൗലിനാംഗ് അറിയപ്പെടുന്നത്. 2003-ൽ ഡിസ്കവർ ഇന്ത്യ ഈ ഗ്രാമത്തിന് ഏഷ്യയിലെ ഏറ്റവും വൃത്തിയുള്ള ഗ്രാമം എന്ന പദവി നൽകിയിട്ടുണ്ട്. മൗലിനോംഗിലെ 95 വീടുകളാണ് ഉള്ളത്. ഈ വിടുകളിലെല്ലാം കൃത്യമായ മാലിന്യ നിർമാർജ്ജന സംവിധാനവുമുണ്ട്. മുളകൊണ്ട് നിർമിച്ച ചവറ്റുകുട്ടയിലാണ് ഇവർ മാലിന്യങ്ങൾ ശേഖരിക്കുന്നത്. പിന്നീട് ഇത് കുഴിയിൽ നിക്ഷേപിച്ച് വളമാക്കി മാറ്റി ഉപയോഗിക്കും.ഈ ഗ്രാമത്തിലെ 100 ശതമാനം ആളുകളും വിദ്യാഭ്യാസമുള്ളവരാണ്. റീസൈക്കിൾ ചെയ്യാൻ കഴിയാത്ത എല്ലാ പ്ലാസ്റ്റിക്കിനും ഈ ഗ്രാമത്തിൽ നിരോധനമുണ്ട്. പുകവലിക്ക് വിലക്കേർപ്പെടുത്തിയ ഗ്രാമത്തിൽ ആരെങ്കിലും പുകവലിച്ചാൽ പിഴ ഈടാക്കാനുള്ള സംവിധാനമുണ്ട്.
നാക്കോ വാലി
ഹിമാചൽ പ്രദേശിലെ സ്പിതി വാലിയിലാണ് കൊച്ചുഗ്രാമം സ്ഥിതി ചെയ്യുന്നത്, ടിബറ്റൻ അതിർത്തിയോട് വളരെ അടുത്തായതിനാൽ തന്നെ
പുരാതന ആശ്രമ സമുച്ചയം ഇവിടത്തെ പ്രധാന ആകർഷണമാണ്.
ബുദ്ധ ലാമകൾ നടത്തുന്ന നാല് പുരാതന ക്ഷേത്രങ്ങൾ ഗ്രാമത്തിലുണ്ട്.
ശുചിത്വത്തിന് വളരെ പ്രശസ്തമാണ് ഇവിടം.
ഖോനോമ
നാഗാലാൻഡിന്റെ തലസ്ഥാനമായ കൊഹിമയിൽ നിന്ന് 20 കിലോമീറ്റർ അകലെയാണ് ഈ ഗ്രാമം. സാമൂഹിക സംരക്ഷണ പദ്ധതികൾക്ക് പേരുകേട്ട ഗ്രാമത്തിൽ ഏകദേശം 3000 ത്തോളം പേരാണ് താമസിക്കുന്നത്. 700 വർഷത്തേളം പഴക്കമുള്ള ഗ്രാമം പച്ചപ്പ് നിറഞ്ഞ വനങ്ങൾക്കും നെൽപ്പാടങ്ങൾക്കും പേരുകേട്ടതാണ്.
സീറോ
മനോഹരമായ താഴ്വരകളും ശുചിത്വവുമാണ് ഈ അരുണാചൽ ഗ്രാമത്തിന്റെ മുഖ്യ ആകർഷണം. എല്ലാ വർഷവും സംഘടിപ്പിക്കുന്ന സംഗീതോത്സവത്തിൽ പങ്കെടുക്കാൻ നിരവധി പ്രശസ്തർ ഇവിടെ എത്താറുണ്ട്. യുനെസ്കോയുടെ ലോക പൈതൃക പട്ടികയിലും ഈ പ്രദേശവും ഇടം പിടിച്ചിട്ടുണ്ട്. മനോഹരമായ പച്ച പുൽമേടുകളാണ് സിറോയെ സഞ്ചാരികളുടെ പ്രിയപ്പെട്ട ഇടമാക്കി മാറ്റുന്നത്. ദേവദാരു, മുള തുടങ്ങിയ മരങ്ങളാൽ മുടപ്പെട്ട കുന്നകൾ പ്രദേശത്തിന്റ സൗന്ദര്യത്തിന് മാറ്റുകൂട്ടുന്നു.
